ഐഎസ്എൽ, ദേശീയ കായിക നിയമം: എഎഫ്സി പ്രതിനിധികളും എഐഎഫ്എഫ് ഭാരവാഹികളും തമ്മിൽ ചർച്ച നടത്തി
ന്യൂഡൽഹി: ഏഷ്യൻ ഫുട്ബോൾ കോൺഫെഡറേഷന്റെ (AFC) ഉന്നതതല സംഘം വെള്ളിയാഴ്ച ഡൽഹിയിൽ വെച്ച് ഓൾ ഇന്ത്യ ഫുട്ബോൾ ഫെഡറേഷൻ (AIFF) ഭാരവാഹികളുമായി നിർണ്ണായക കൂടിക്കാഴ്ച നടത്തി. എഎഫ്സി ജനറൽ സെക്രട്ടറി ദാത്തൂക് സെരി വിൻഡ്സർ ജോണിന്റെ നേതൃത്വത്തിലുള്ള സംഘമാണ് എഐഎഫ്എഫ് പ്രതിനിധികളുമായി ചർച്ചകൾ നടത്തിയത്.
ഇന്ത്യൻ സൂപ്പർ ലീഗ് (ISL), എഐഎഫ്എഫ് ഭരണഘടന, നാഷണൽ സ്പോർട്സ് ഗവേണൻസ് ആക്ട് എന്നിവയാണ് കൂടിക്കാഴ്ചയിലെ പ്രധാന വിഷയങ്ങൾ. എഎഫ്സി ജനറൽ സെക്രട്ടറി ദാത്തൂക് സെരി വിൻഡ്സർ ജോൺ, ഡെപ്യൂട്ടി ജനറൽ സെക്രട്ടറി വാഹിദ് കർദാനി എന്നിവർ എഐഎഫ്എഫ് പ്രസിഡന്റ് കല്യാൺ ചൗബേ, ഡെപ്യൂട്ടി സെക്രട്ടറി ജനറൽ സത്യനാരായൺ എം എന്നിവരുമായി കൂടിക്കാഴ്ച നടത്തിയ വിവരം എഐഎഫ്എഫ് തങ്ങളുടെ ഔദ്യോഗിക എക്സ് (X) ഹാൻഡിലിലൂടെ അറിയിച്ചു.
വരാനിരിക്കുന്ന ഐഎസ്എൽ സീസണിന്റെ ക്രമീകരണങ്ങൾ, മാർഗ്ഗനിർദ്ദേശങ്ങൾ, റോഡ്മാപ്പ് എന്നിവയെക്കുറിച്ച് ഉദ്യോഗസ്ഥർ വിശദമായി വിലയിരുത്തി. കൂടാതെ, എഐഎഫ്എഫ് ഭരണഘടനയുടെ നിലവിലെ ഘടനാപരമായ അവസ്ഥയെക്കുറിച്ചും 2025-ലെ നാഷണൽ സ്പോർട്സ് ഗവേണൻസ് ആക്ട് പാലിക്കുന്നതുമായി ബന്ധപ്പെട്ട കാര്യങ്ങളും എഐഎഫ്എഫ് പ്രതിനിധികൾ എഎഫ്സി സംഘത്തിന് വിശദീകരിച്ചു നൽകി.
ഫുട്ബോൾ വികസനവുമായി ബന്ധപ്പെട്ട എല്ലാ കാര്യങ്ങളിലും എഐഎഫ്എഫിന് തുടർന്നും അഡ്മിനിസ്ട്രേറ്റീവ് പിന്തുണയും മാർഗ്ഗനിർദ്ദേശങ്ങളും നൽകുമെന്ന് എഎഫ്സി ഉറപ്പുനൽകിയതായി എഐഎഫ്എഫ് അറിയിച്ചു.
Published on Jun 05, 2026