ലമിൻ യമാലിനെ നേരിടാൻ കുക്കുറെല്ല ബുദ്ധിമുട്ടും: മുന്നറിയിപ്പുമായി ഡാനി ഓൽമോ

ബാഴ്‌സലോണ മിഡ്‌ഫീൽഡർ ഡാനി ഓൽമോ തന്റെ സ്പാനിഷ് സഹതാരം മാർക്ക് കുകുറെല്ലയ്ക്ക് മുന്നറിയിപ്പുമായി രംഗത്തെത്തി. റയൽ മാഡ്രിഡിലേക്കുള്ള കുകുറെല്ലയുടെ പുതിയ ട്രാൻസ്ഫറിന് പിന്നാലെയാണ് എൽ ക്ലാസിക്കോ മത്സരങ്ങളിൽ ലമിൻ യമാലിനെ നേരിടാൻ തയ്യാറായിരിക്കണമെന്ന് ഓൽമോ ഓർമ്മിപ്പിച്ചത്.

“ഇതൊട്ടും പ്രതീക്ഷിച്ചിരുന്നില്ല. അവൻ കാര്യം രഹസ്യമാക്കി വെച്ചു. ഇതാണ് അവൻ ആഗ്രഹിച്ചതെങ്കിൽ എനിക്ക് സന്തോഷമേയുള്ളൂ, കാരണം അവൻ എന്റെ സുഹൃത്താണ്. ഇനി ലീഗിൽ അവന് കടുത്ത വെല്ലുവിളികൾ നേരിടേണ്ടി വരും, ഞങ്ങൾക്കും അത് ബാധകമാണ്. ഉദാഹരണത്തിന്, ലമിൻ യമാലിനെതിരെ കളിക്കുമ്പോൾ അവന് നന്നായി കഷ്ടപ്പെടേണ്ടി വരും,” ഓൽമോ പറഞ്ഞു.

“രണ്ട് വർഷമായി വിജയിക്കാത്ത അവർ മികച്ച കളിക്കാരെ ടീമിലെടുത്ത് ശക്തിപ്പെടുത്തുന്നത് സ്വാഭാവികമാണ്. അവർ ലോകോത്തര താരങ്ങളാണ്, പക്ഷേ ഞങ്ങൾ ആശങ്കപ്പെടുന്നില്ല. ഗോർഡനെ ടീമിലെത്തിക്കാൻ സാധിച്ചത് വലിയൊരു നേട്ടമായാണ് ഞങ്ങൾ കാണുന്നത്,” ഓൽമോ കൂട്ടിച്ചേർത്തു.