എഐഎഫ്എഫ് പേര് മാറ്റുന്നു; ‘ഫുട്ബോൾ ഫെഡറേഷൻ ഓഫ് ഭാരത്’ ആക്കാൻ കായിക മന്ത്രാലയത്തിന് നിർദ്ദേശം

ഓൾ ഇന്ത്യ ഫുട്ബോൾ ഫെഡറേഷൻ പേര് മാറ്റത്തിനൊരുങ്ങുന്നു; ഫുട്ബോൾ ഫെഡറേഷൻ ഓഫ് ഭാരത് എന്നാക്കാൻ തീരുമാനം

ന്യൂഡൽഹി: ഓൾ ഇന്ത്യ ഫുട്ബോൾ ഫെഡറേഷന്റെ (AIFF) പേര് ‘ഫുട്ബോൾ ഫെഡറേഷൻ ഓഫ് ഭാരത്’ (FFB) എന്നാക്കി മാറ്റാൻ ഫെഡറേഷൻ തീരുമാനിച്ചു. ശനിയാഴ്ച ചേർന്ന സ്പെഷ്യൽ ജനറൽ ബോഡി യോഗത്തിലാണ് ഇതുസംബന്ധിച്ച നിർദേശം അംഗീകരിച്ചത്.

കേന്ദ്ര കായിക മന്ത്രാലയത്തിന്റെ അനുമതി ലഭിച്ചാൽ മാത്രമേ പേരുമാറ്റം നടപ്പിലാകൂ എന്ന് എഐഎഫ്എഫ് പ്രസിഡന്റ് കല്യാൺ ചൗബേ വാർത്താ ഏജൻസിയോട് പറഞ്ഞു. തുടർന്ന് ഫിഫയുടെ (FIFA) അംഗീകാരവും ഇതിനായി തേടും. “ഇതൊരു തുടക്കമാണ്. മന്ത്രാലയത്തിന് ഇതേക്കുറിച്ച് വ്യത്യസ്തമായ അഭിപ്രായമുണ്ടെങ്കിൽ പേരുമാറ്റം സാധ്യമാകില്ല. മന്ത്രാലയം അംഗീകരിച്ചാൽ വിഷയം ജനറൽ ബോഡിയിൽ അവതരിപ്പിക്കും. അതിനുശേഷം ഫിഫയ്ക്ക് അയക്കും,” അദ്ദേഹം വ്യക്തമാക്കി. തുർക്കിയെ (തുർക്കി), ചെക്കിയ (ചെക്ക് റിപ്പബ്ലിക്) തുടങ്ങിയ രാജ്യങ്ങൾ ഫുട്ബോൾ അസോസിയേഷനുകളുടെ പേര് മാറ്റിയ ഉദാഹരണങ്ങൾ അദ്ദേഹം ചൂണ്ടിക്കാട്ടി.

2026-27 ഐഎസ്എൽ സെപ്റ്റംബർ 4-ന് തുടങ്ങും

2026-27 സീസൺ ഇന്ത്യൻ സൂപ്പർ ലീഗ് (ISL) സെപ്റ്റംബർ നാലിന് ആരംഭിക്കാൻ ജനറൽ ബോഡി യോഗം അംഗീകാരം നൽകി. എഐഎഫ്എഫിന്റെ വാർഷിക കലണ്ടറും യോഗത്തിൽ പാസാക്കി. ഐഎസ്എൽ മത്സരക്രമം മാനേജിങ് കമ്മിറ്റി തീരുമാനിക്കും. 14 ടീമുകൾ പങ്കെടുക്കുന്ന ടൂർണമെന്റ് ഏഴ് മാസം നീണ്ടുനിൽക്കാനാണ് സാധ്യത.

ഐഎസ്എൽ ഘടനയെക്കുറിച്ച് അന്തിമ തീരുമാനമെടുക്കാൻ എഐഎഫ്എഫിന് കഴിഞ്ഞില്ല. ഈ വിഷയം മാനേജിങ് കമ്മിറ്റിയുടെ പരിഗണനയ്ക്ക് വിട്ടു. 14 ക്ലബ്ബുകളിൽ നിന്നുള്ള അഞ്ച് പ്രതിനിധികൾ, ഫെഡറേഷനിൽ നിന്നുള്ള മൂന്ന് ഉദ്യോഗസ്ഥർ, വാണിജ്യ പങ്കാളികളിൽ നിന്നുള്ള മൂന്ന് പേർ എന്നിവരടങ്ങുന്നതാണ് ഈ കമ്മിറ്റി. ക്ലബ്ബുകളുമായി ചർച്ച നടത്തിയ ശേഷം മാനേജിങ് കമ്മിറ്റി ഇക്കാര്യത്തിൽ തീരുമാനമെടുക്കുകയും എക്സിക്യൂട്ടീവ് കമ്മിറ്റി അത് സാധൂകരിക്കുകയും ചെയ്യും.

നേരത്തെ മെയ് 23-ന് ചേർന്ന പ്രത്യേക ജനറൽ ബോഡി യോഗത്തിൽ നാഷണൽ സ്പോർട്സ് ഗവേണൻസ് ആക്ട്, 2025 (NSGA 2025) അംഗീകരിക്കാൻ എഐഎഫ്എഫ് തീരുമാനിച്ചിരുന്നു. എഐഎഫ്എഫ് ഭരണഘടന ഇനി ഈ നിയമത്തിനനുസരിച്ചായിരിക്കും പ്രവർത്തിക്കുക. ഈ മാസം ആദ്യം, കായിക മന്ത്രി മൻസുഖ് മാണ്ഡവ്യയുമായുള്ള ചർച്ചയ്ക്ക് ശേഷം ഐഎസ്എൽ ക്ലബ്ബ് അധിഷ്ഠിത മാതൃകയിൽ രണ്ട് വർഷത്തേക്ക് നടത്തുന്നതിന് എഐഎഫ്എഫ് തത്വത്തിൽ അംഗീകാരം നൽകിയിരുന്നു.

ഐഎസ്എൽ വാണിജ്യ അവകാശങ്ങൾക്കായി ലണ്ടൻ ആസ്ഥാനമായുള്ള ജീനിയസ് സ്പോർട്സ് ഉയർന്ന ബിഡ് സമർപ്പിച്ചിരുന്നു. 15+5 വർഷത്തേക്ക് 2,129 കോടി രൂപയാണ് ഇവർ വാഗ്ദാനം ചെയ്തത്. എന്നാൽ, ക്ലബ്ബുകൾ ഈ കരാറിനെ എതിർത്തു. കൂടാതെ, ക്ലബ്ബുകളിൽ നിന്ന് പ്രവേശന ഫീസ് ഈടാക്കാനുള്ള എഐഎഫ്എഫ് നീക്കത്തോടും ഐഎസ്എൽ ക്ലബ്ബുകൾക്ക് വിയോജിപ്പുണ്ട്.