ലോകകപ്പ് ഫുട്ബോളിൽ പുതിയ റെക്കോർഡ് തേടി അർജന്റീന സൂപ്പർ താരം ലയണൽ മെസ്സി വീണ്ടും കളത്തിലിറങ്ങുന്നു. വരാനിരിക്കുന്ന മത്സരത്തിൽ ഓസ്ട്രിയയ്ക്കെതിരെ ഒരു ഗോൾ കൂടി നേടിയാൽ ലോകകപ്പിലെ എക്കാലത്തെയും മികച്ച ഗോൾവേട്ടക്കാരൻ എന്ന ഖ്യാതി മെസ്സിക്ക് സ്വന്തമാകും. നിലവിൽ മിറോസ്ലാവ് ക്ലോസെയുടെ റെക്കോർഡിനൊപ്പമാണ് മെസ്സിയുള്ളത്. മാത്രമല്ല, ലോകകപ്പിൽ തുടർച്ചയായി ആറു മത്സരങ്ങളിൽ ഗോൾ നേടുന്ന മൂന്നാമത്തെ താരമെന്ന അപൂർവ്വ റെക്കോർഡും മെസ്സിയെ കാത്തിരിക്കുന്നുണ്ട്.
അൾജീരിയക്കെതിരായ കഴിഞ്ഞ മത്സരത്തിൽ ഹാട്രിക് നേടിയതോടെ തന്റെ കരിയറിലെ 61-ാം ഹാട്രിക്കാണ് മെസ്സി പൂർത്തിയാക്കിയത്. 39-ാം വയസ്സിലും തകർപ്പൻ ഫോമിൽ തുടരുന്ന താരം ടീമിന്റെ ആക്രമണനിരയിൽ നിർണ്ണായക സാന്നിധ്യമാണ്. മെസ്സിക്കൊപ്പം അലക്സിസ് മാക് അലിസ്റ്റർ, എൻസോ ഫെർണാണ്ടസ് എന്നിവർ നയിക്കുന്ന മധ്യനിരയും അർജന്റീനയുടെ കരുത്താണ്. അൾജീരിയക്കെതിരായ മത്സരത്തിൽ എതിരാളികളെ ഗോൾ മുഖത്തേക്ക് അടുപ്പിക്കാതെ പ്രതിരോധം തീർക്കാനും അർജന്റീനക്ക് സാധിച്ചിരുന്നു.
അതേസമയം, നാല് മത്സരങ്ങളിലെ വിജയത്തിളക്കവുമായാണ് ഓസ്ട്രിയ അർജന്റീനയെ നേരിടാനൊരുങ്ങുന്നത്. എന്നാൽ പരിക്കിന്റെ പിടിയിലുള്ള ക്യാപ്റ്റൻ ഡേവിഡ് അലാബ ഉൾപ്പെടെയുള്ള പ്രധാന താരങ്ങളുടെ കാര്യത്തിൽ കോച്ച് റാൽഫ് റാംഗ്നിക്കിന് ആശങ്കയുണ്ട്. പരിക്ക് മാറിയെത്തുന്ന താരങ്ങളുടെ കാര്യത്തിൽ അർജന്റീനയും ജാഗ്രതയിലാണ്.
ഓസ്ട്രിയക്കെതിരായ മത്സരത്തിൽ വിജയിക്കുകയും മറ്റൊരു മത്സരത്തിൽ ജോർദാൻ പരാജയപ്പെടുകയും ചെയ്താൽ ഗ്രൂപ്പ് ജെയിൽ നിന്ന് അർജന്റീനയ്ക്ക് നോക്കൗട്ട് ഉറപ്പിക്കാം. വീണ്ടുമൊരു ലോകകിരീടം സ്വപ്നം കാണുന്ന അർജന്റീനയ്ക്ക് ഈ മത്സരം വളരെ നിർണ്ണായകമാണ്. പുതിയ ചരിത്രങ്ങൾ കുറിച്ചുകൊണ്ട് ഫുട്ബോൾ ലോകത്തെ വിസ്മയിപ്പിക്കുന്നത് മെസ്സി ഇത്തവണയും തുടരുമെന്നാണ് ആരാധകരുടെ പ്രതീക്ഷ.