“ലമീൻ ഒരു ലോകോത്തര താരമാണ്. പരിശീലനത്തിലും കളിക്കളത്തിലും താൻ ആരാണെന്ന് അവൻ തെളിയിക്കുന്നുണ്ട്. അവനെ ആ പട്ടികയിൽ ഉൾപ്പെടുത്തണോ വേണ്ടയോ എന്ന് തീരുമാനിക്കേണ്ടത് നിങ്ങളാണ്. എന്നാൽ അവനെക്കുറിച്ച് എനിക്ക് ഒരു സംശയവുമില്ല,” ഓൾമോ പറഞ്ഞു.

യമാലുമായുള്ള തന്റെ കൂട്ടുകെട്ടിനെക്കുറിച്ച് ഓൾമോ പറയുന്നത് ഇങ്ങനെ: “ഞങ്ങൾ തമ്മിൽ അധികം സംസാരിക്കാറില്ല. കളിയിലെ കാര്യങ്ങൾ മാത്രമാണ് പങ്കുവെക്കാറുള്ളത്. എന്നാൽ ഒന്നു നോക്കിയാൽ തന്നെ ഞങ്ങൾ പരസ്പരം മനസ്സിലാക്കും. വളരെ കാലമായി ഞങ്ങൾ ഒരുമിച്ച് കളിക്കുന്നു. അവന് എന്താണ് ഇഷ്ടമെന്നും എന്തിലാണ് അവന് താൽപ്പര്യമെന്നും എനിക്കറിയാം. അവൻ വൺ-ഓൺ-വൺ മാത്രമല്ല, വൺ-ഓൺ-ടു സാഹചര്യങ്ങളിലും മിടുക്കനാണ്. അവന് കൂടുതൽ ഇടം നൽകാൻ ഞാൻ ശ്രമിക്കാറുണ്ട്. ചിലപ്പോൾ വൺ-ടു പാസുകൾക്കായി ഞാൻ അവനടുത്തേക്ക് നീങ്ങും. എപ്പോഴും അവന് എന്റെ പൂർണ്ണ പിന്തുണയുണ്ടാകും.”

സൗദി അറേബ്യക്കെതിരായ മത്സരത്തിൽ തന്റെ ആദ്യ ലോകകപ്പ് ഗോൾ നേടിയ ലമീൻ യമാൽ, ഗ്രൂപ്പ് ഘട്ടത്തിലെ അവസാന മത്സരത്തിൽ ഉറുഗ്വേയ്‌ക്കെതിരെയും മികച്ച പ്രകടനം പുറത്തെടുക്കാനുള്ള തയ്യാറെടുപ്പിലാണ്.