2026 ലോകകപ്പിന്റെ നടത്തിപ്പിലെ വീഴ്ചകൾക്കെതിരെ ഫിഫയ്ക്കും പ്രസിഡന്റ് ജിയാനി ഇൻഫാന്റീനോയ്ക്കുമെതിരെ രൂക്ഷ വിമർശനവുമായി ഇറാൻ ക്യാപ്റ്റൻ മെഹ്ദി തരേമി രംഗത്ത്. യാത്രാ സൗകര്യങ്ങളുമായും വിസയുമായും ബന്ധപ്പെട്ട പ്രശ്നങ്ങൾ പരിഹരിക്കുന്നതിൽ സംഘാടകർ പരാജയപ്പെട്ടെന്ന് തരേമി കുറ്റപ്പെടുത്തി. ഫിഫയെ വിമർശിച്ചുകൊണ്ട് ഇറാൻ പരിശീലകൻ അമീർ ഗലേനോയിയും രംഗത്തെത്തി. ടൂർണമെന്റിന്റെ സഹ-ആതിഥേയരായ അമേരിക്ക തങ്ങളുടെ ടീമിനോട് നീതിരഹിതമായി പെരുമാറിയെന്ന് അദ്ദേഹം പറഞ്ഞു.
വിസ പ്രശ്നങ്ങൾ ടീമിന്റെ 2026 ലോകകപ്പ് ക്യാമ്പെയ്നിനെ സാരമായി ബാധിച്ചിട്ടുണ്ട്. ഇതിനെത്തുടർന്ന് ടീമിലെ 11 മുതിർന്ന ഉദ്യോഗസ്ഥർക്ക് ടീമിനൊപ്പം ചേരാൻ സാധിച്ചില്ല. മെക്സിക്കോയിലെ തിജുവാനയിലേക്ക് താവളം മാറ്റേണ്ടി വന്നതും ഗ്രൂപ്പ് മത്സരങ്ങൾക്കായി അമേരിക്കയിലേക്ക് തുടർച്ചയായി യാത്ര ചെയ്യേണ്ടി വന്നതും കളിക്കാരുടെ ആരോഗ്യം വീണ്ടെടുക്കുന്നതിനെയും ലോജിസ്റ്റിക്സ് പ്രവർത്തനങ്ങളെയും ബാധിച്ചു.
Also Read: ജോർദാനെതിരായ മത്സരത്തിൽ ലയണൽ മെസ്സി ബെഞ്ചിലിരിക്കും; നോക്കൗട്ട് റൗണ്ടിന് മുൻഗണന നൽകി അർജന്റീന
‘ഇതൊരു ദുരന്ത ലോകകപ്പാണ്’
പ്രശ്നങ്ങൾ പരിഹരിക്കാമെന്ന് ഇൻഫാന്റീനോ ഉറപ്പ് നൽകിയിരുന്നെങ്കിലും അത് പാലിക്കപ്പെട്ടില്ലെന്ന് തരേമി പറഞ്ഞു. ഈജിപ്തിനെതിരായ സമനിലയ്ക്ക് ശേഷം സംസാരിക്കവെ, “ഇതൊരു ദുരന്ത ലോകകപ്പാണ്” എന്നാണ് അദ്ദേഹം വിശേഷിപ്പിച്ചത്.
“ഞങ്ങളുടെ ലോജിസ്റ്റിക് ടീമിന് ഇവിടെയെത്താൻ വിസ ലഭിച്ചില്ല. പിന്നെ എങ്ങനെയാണ് ഞങ്ങൾക്ക് തിജുവാനയിൽ നിന്ന് യാത്ര ചെയ്യാൻ സാധിക്കുക? തിജുവാനയിലെ ജനങ്ങളെയും മെക്സിക്കോയെയും ഞങ്ങൾ സ്നേഹിക്കുന്നു, അവർ വളരെ നല്ലവരാണ്. എന്നാൽ ഒരു പ്രൊഫഷണൽ ടൂർണമെന്റിൽ ഇത്തരമൊരു അവസ്ഥ ശരിയല്ല. ഇത് അനീതിയാണ്. ഞങ്ങളെ ആരും സഹായിക്കുന്നില്ല,” തരേമി കൂട്ടിച്ചേർത്തു.
പരിശീലകൻ അമീർ ഗലേനോയിയും കാര്യങ്ങൾ തുറന്നു പറഞ്ഞു. “പ്രശ്നങ്ങൾ കുറയ്ക്കാൻ ഇൻഫാന്റീനോ പരമാവധി ശ്രമിച്ചിട്ടുണ്ടെന്ന് എനിക്കറിയാം. എന്നാൽ ആതിഥേയരാജ്യം ഞങ്ങളോട് ഒട്ടും മാന്യമായിട്ടല്ല പെരുമാറിയത്,” അദ്ദേഹം വ്യക്തമാക്കി.
“ഭാവിയിൽ ടീമുകളോട് ഇത്തരത്തിൽ പെരുമാറാൻ ആതിഥേയരെ അനുവദിക്കരുതെന്ന് ഞാൻ ഫിഫയോട് ആവശ്യപ്പെടുന്നു. ഇത്തരം പെരുമാറ്റങ്ങൾക്കെതിരെ ഇൻഫാന്റീനോ നിലപാട് എടുക്കുമെന്ന് പ്രതീക്ഷിക്കുന്നു. ഞങ്ങളോട് കാണിച്ചത് വളരെ മോശം പെരുമാറ്റമാണ്. ഓരോ മത്സരത്തിന് മുമ്പും രണ്ട് ദിവസം മുൻപേ എത്തുന്നതിനും രണ്ട് ആഴ്ച മുൻപേ വരാൻ അനുവാദം ചോദിച്ചപ്പോൾ അത് നിഷേധിച്ചതും ഞങ്ങളെ തളർത്തി. എല്ലാ പ്രതിസന്ധികൾക്കിടയിലും മികച്ച പ്രകടനം കാഴ്ചവെക്കാൻ കഴിഞ്ഞത് ഞങ്ങളുടെ വലിയ നേട്ടമാണ്,” ഗലേനോയി പറഞ്ഞു.