ദക്ഷിണ അമേരിക്കൻ ടീമായ കൊളംബിയ 24 ഷോട്ടുകളാണ് പോസ്റ്റിലേക്ക് പായിച്ചത്. ഇതിൽ ആറെണ്ണം ലക്ഷ്യത്തിലെത്തി. മറുഭാഗത്ത് പോർച്ചുഗൽ 13 ഷോട്ടുകൾ പരീക്ഷിച്ചെങ്കിലും രണ്ടെണ്ണം മാത്രമാണ് ലക്ഷ്യത്തിലേക്ക് എത്തിയത്. എക്‌സ്‌പെക്റ്റഡ് ഗോൾസ് (xG) കണക്കുകളിലും കൊളംബിയ തന്നെയാണ് മുന്നിൽ. കൊളംബിയ 1.62 xG നിലനിർത്തിയപ്പോൾ പോർച്ചുഗലിന് 0.73 xG മാത്രമേ നേടാനായുള്ളൂ.

പന്ത് കൈവശം വെക്കുന്നതിൽ നെസ്റ്റർ ലോറെൻസോയുടെ കൊളംബിയ 47 ശതമാനം ആധിപത്യം പുലർത്തി. റോബർട്ടോ മാർട്ടിനസ് പരിശീലിപ്പിക്കുന്ന പോർച്ചുഗൽ 45 ശതമാനം സമയം പന്ത് കൈവശം വെച്ചു. ശേഷിച്ച 8 ശതമാനം സമയം പന്ത് ഇരു ടീമുകളുടെയും നിയന്ത്രണത്തിലായിരുന്നില്ലെന്ന് ഫിഫയുടെ കണക്കുകൾ വ്യക്തമാക്കുന്നു.

പാസിംഗിലും കൊളംബിയ മികവ് കാണിച്ചു. 548 ശ്രമങ്ങളിൽ 488 പാസുകൾ അവർ ലക്ഷ്യത്തിലെത്തിച്ചു. പോർച്ചുഗൽ ആകട്ടെ 467 ശ്രമങ്ങളിൽ 425 പാസുകൾ പൂർത്തിയാക്കി. വിങ്ങുകളിൽ നിന്നും പന്ത് ബോക്സിലേക്ക് എത്തിക്കുന്നതിൽ കൊളംബിയ കൂടുതൽ കാര്യക്ഷമത പുലർത്തി. 14 ക്രോസുകളിൽ ഏഴെണ്ണം ലക്ഷ്യത്തിലെത്തിക്കാൻ അവർക്ക് കഴിഞ്ഞു. എന്നാൽ പോർച്ചുഗലിന് 15 ശ്രമങ്ങളിൽ നിന്ന് രണ്ട് ക്രോസുകൾ മാത്രമേ വിജയകരമായി പൂർത്തിയാക്കാൻ സാധിച്ചുള്ളൂ.