പോളിഷ് സ്‌ട്രൈക്കർ റോബർട്ട് ലെവൻഡോവ്സ്കി മേജർ ലീഗ് സോക്കറിൽ (MLS) ചേരുന്നു. താരം ചിക്കാഗോ ഫയറുമായി ഡെസിഗ്നേറ്റഡ് പ്ലെയർ കരാറിൽ ഒപ്പിട്ടതായി ക്ലബ്ബ് ഔദ്യോഗികമായി അറിയിച്ചു.

യൂറോപ്യൻ ഫുട്ബോളിലെ മികച്ച കരിയറിന് ശേഷം 37 വയസ്സുകാരനായ ലെവൻഡോവ്സ്കി ബാഴ്‌സലോണ വിടുകയും അമേരിക്കയിൽ തന്റെ പുതിയ ഫുട്ബോൾ അധ്യായത്തിന് തുടക്കം കുറിക്കുകയും ചെയ്യുന്നു.

2022-ൽ ബയേൺ മ്യൂണിക്കിൽ നിന്നാണ് ഈ ഇതിഹാസ താരം ബാഴ്‌സലോണയിലെത്തിയത്. കാറ്റലൻ ക്ലബ്ബിനായി രണ്ട് ലാ ലിഗ കിരീടങ്ങൾ നേടാനും നൂറിലധികം ഗോളുകൾ സ്കോർ ചെയ്യാനും ലെവൻഡോവ്സ്കിക്ക് സാധിച്ചു. ബാഴ്‌സലോണയിൽ നിന്ന് ഫ്രീ ഏജന്റായി പുറത്തുവന്ന താരം വിദേശത്ത് കരിയർ തുടരാൻ തീരുമാനിക്കുകയായിരുന്നു.

ഫുട്ബോൾ ലോകത്തെ ഏറ്റവും മികച്ച ഗോൾവേട്ടക്കാരിൽ ഒരാളായ ലെവൻഡോവ്‌സ്കിയെ ടീമിലെത്തിച്ചതിലൂടെ തങ്ങളുടെ മുന്നേറ്റ നിരയ്ക്ക് കരുത്തുപകരാൻ കഴിയുമെന്ന പ്രതീക്ഷയിലാണ് ചിക്കാഗോ ഫയർ.