കൊൽക്കത്ത: 2026-27 സീസണിലെ ഇന്ത്യൻ സൂപ്പർ ലീഗിൽ (ഐഎസ്എൽ) പങ്കെടുക്കുന്ന കാര്യം ജൂൺ 15-നകം സ്ഥിരീകരിക്കണമെന്ന് ഓൾ ഇന്ത്യ ഫുട്ബോൾ ഫെഡറേഷൻ (എഐഎഫ്എഫ്) ക്ലബ്ബുകളോട് ആവശ്യപ്പെട്ടു. ഐഎസ്എല്ലിൽ പങ്കെടുക്കുന്നതിന് ഒരു കോടി രൂപ ഫീസ് നൽകണമെന്നും ക്ലബ്ബുകളെ അറിയിച്ചിട്ടുണ്ട്.
ജൂൺ 15-ന് മുൻപായി ക്ലബ്ബ് ഉടമകളുടെയും എഐഎഫ്എഫ് പ്രതിനിധികളുടെയും നേതൃത്വത്തിൽ ഐഎസ്എൽ ഗവേണിംഗ് കൗൺസിൽ യോഗം ചേരാൻ സാധ്യതയുണ്ട്.
ഇന്ത്യൻ ഫുട്ബോളിലെ നിലവിലെ അനിശ്ചിതത്വം കാരണം അടുത്ത സീസണിലെ പങ്കാളിത്തം പുനഃപരിശോധിക്കേണ്ടി വരുമെന്ന് കേരള ബ്ലാസ്റ്റേഴ്സിന്റെ എക്സ് (X) ഹാൻഡിലിലൂടെ വെള്ളിയാഴ്ച വൈകിട്ട് ഐഎസ്എൽ ക്ലബ്ബുകൾ സംയുക്ത പ്രസ്താവനയിൽ വ്യക്തമാക്കി.
ഐഎസ്എല്ലും ഒരു കപ്പ് മത്സരവും നടത്തുന്നതിനായി ഓരോ സീസണിലും ആവശ്യമായ ഏകദേശം 60 കോടി രൂപ കണ്ടെത്താമെന്ന് എഫ്സി ഗോവ സിഇഒ രവി പുഷ്കറിന്റെ നേതൃത്വത്തിലുള്ള ക്ലബ്ബുകൾ എഐഎഫ്എഫിന് മുന്നിൽ നിർദ്ദേശം വെച്ചു. അടുത്ത 15+5 വർഷത്തേക്ക് വാർഷിക വിഹിതമായി 7 ദശലക്ഷം ഡോളർ നൽകാമെന്ന് വാഗ്ദാനം ചെയ്ത കൊമേഴ്സ്യൽ പങ്കാളി ‘ജീനിയസ് സ്പോർട്സി’ന്റെ മിക്ക ഉറപ്പുകളും തങ്ങൾ നിറവേറ്റാമെന്നും ക്ലബ്ബുകൾ അറിയിച്ചു.
ക്ലബ്ബുകളുടെയും ജീനിയസ് സ്പോർട്സിന്റെയും ഈ നിർദ്ദേശങ്ങൾ ശനിയാഴ്ച കൊൽക്കത്തയിൽ നടക്കുന്ന എഐഎഫ്എഫ് പ്രത്യേക ജനറൽ ബോഡി യോഗത്തിൽ അവതരിപ്പിക്കും. ഫുട്ബോൾ രംഗത്ത് വലിയ സ്വാധീനമുള്ള, ന്യൂയോർക്ക് സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്യപ്പെട്ട ജീനിയസ് സ്പോർട്സ് കമ്പനി തങ്ങളുമായി സഹകരിക്കാൻ സന്നദ്ധമാണെന്നും ക്ലബ്ബുകളെ അറിയിച്ചിട്ടുണ്ട്.