ടോക്ക് സ്പോർട്ടിന്റെ അലക്സ് ക്രൂക്ക് റിപ്പോർട്ട് ചെയ്യുന്നത് പ്രകാരം, ബോൺമൗത്ത് മിഡ്‌ഫീൽഡർ അലക്സ് സ്കോട്ടിനെ സ്വന്തമാക്കാൻ ലിവർപൂൾ താൽപ്പര്യം പ്രകടിപ്പിക്കുന്നതായി സൂചനകളുണ്ട്.

22 വയസ്സുള്ള ഈ താരം കഴിഞ്ഞ മൂന്ന് വർഷമായി അന്റോണി ഇറോലയുടെ കീഴിലാണ് കളിക്കുന്നത്. ഇറോലയുടെ ശൈലിക്ക് ഏറ്റവും അനുയോജ്യമായ താരമായാണ് സ്കോട്ടിനെ വിലയിരുത്തുന്നത്.

രണ്ട് വിങ്ങർമാരെ ടീമിലെത്തിക്കുന്നതിനാണ് ലിവർപൂൾ നിലവിൽ മുൻഗണന നൽകുന്നത്. എങ്കിലും, മിഡ്‌ഫീൽഡ് നിര ശക്തിപ്പെടുത്താനും ക്ലബ് ലക്ഷ്യമിടുന്നുണ്ട്. പ്രത്യേകിച്ച് കർട്ടിസ് ജോൺസോ അലക്സിസ് മാക് അലിസ്റ്ററോ ഈ വേനൽക്കാലത്ത് ടീം വിടുകയാണെങ്കിൽ സ്കോട്ടിനെ പരിഗണിക്കാനാണ് സാധ്യത.

ബോൺമൗത്തുമായുള്ള അലക്സ് സ്കോട്ടിന്റെ നിലവിലെ കരാർ അവസാനിക്കാൻ ഇനിയും രണ്ട് വർഷമുണ്ട്. താരത്തെക്കൊണ്ട് പുതിയ കരാറിൽ ഒപ്പിടുവിക്കാനാണ് ബോൺമൗത്തിന്റെ ശ്രമം, എന്നാൽ ഇക്കാര്യത്തിൽ ഇപ്പോഴും വ്യക്തത വന്നിട്ടില്ല.