മുൻ ബാഴ്സലോണ മിഡ്‌ഫീൽഡർ ആൻഡ്രെസ് ഇനിയേസ്റ്റ തന്റെ മാനേജീരിയൽ കരിയറിന് ഔദ്യോഗികമായി തുടക്കം കുറിച്ചു. യുഎഇയിലെ സെക്കൻഡ് ഡിവിഷൻ ക്ലബ്ബായ ഗൾഫ് യുണൈറ്റഡിന്റെ പരിശീലകനായി ഇനിയേസ്റ്റ ചുമതലയേറ്റു. ഫുട്ബോൾ താരമെന്ന നിലയിൽ നിന്ന് പരിശീലകനെന്ന നിലയിലേക്കുള്ള ഇനിയേസ്റ്റയുടെ പുതിയ യാത്രയാണിത്.

ബാഴ്സലോണയിൽ 22 വർഷം നീണ്ട കരിയറിനിടെ നാല് ചാമ്പ്യൻസ് ലീഗ് കിരീടങ്ങൾ സ്വന്തമാക്കിയ ഇതിഹാസ താരമാണ് ഇനിയേസ്റ്റ. യുഎഇയിലെ എമിറേറ്റ്സ് ക്ലബ്ബിൽ അവസാനമായി കളിച്ച ശേഷം 2024-ൽ അദ്ദേഹം പ്രൊഫഷണൽ ഫുട്ബോളിൽ നിന്ന് വിരമിച്ചിരുന്നു.

കളിക്കളത്തിൽ നിന്ന് വിരമിച്ചതിന് ശേഷവും ഇനിയേസ്റ്റ ഈ മേഖലയിൽ തന്നെയായിരുന്നു താമസം. ഈ നിയമനത്തിലൂടെ അദ്ദേഹം പൂർണ്ണമായും പരിശീലനരംഗത്തേക്ക് കടക്കുകയാണ്.

തന്റെ ആഗോള പ്രശസ്തി ഉണ്ടായിരുന്നിട്ടും, ഉയർന്ന പ്രൊഫൈലിലുള്ള സ്ഥാനങ്ങൾ തേടുന്നതിന് പകരം പരിശീലനത്തിന്റെ അടിസ്ഥാന തലത്തിൽ നിന്ന് തന്നെ കാര്യങ്ങൾ പഠിക്കാനാണ് സ്പെയിൻ മുൻ താരം ആഗ്രഹിക്കുന്നത്. ഇതിന്റെ ഭാഗമായാണ് അദ്ദേഹം ഇത്തരമൊരു വേഷം തിരഞ്ഞെടുത്തിരിക്കുന്നത്.

ഇതിനുമുമ്പ് സഹതാരമായിരുന്ന സാവി ഹെർണാണ്ടസ് പിന്തുടർന്ന പാതയാണ് ഇനിയേസ്റ്റയും സ്വീകരിക്കുന്നത്. ഖത്തറിലെ അൽ സാദിലൂടെ പരിശീലനം തുടങ്ങിയ സാവി, പിന്നീട് നിരവധി കിരീടങ്ങൾ സ്വന്തമാക്കിയതിന് ശേഷമാണ് ബാഴ്സലോണയുടെ ചുമതലയേറ്റത്.

യുഎഇയുടെ താഴത്തെ ഡിവിഷനുകളിൽ മത്സരിക്കുന്ന ഗൾഫ് യുണൈറ്റഡ്, ഭാവിയിൽ രാജ്യത്തെ ടോപ്പ് ഫ്ലൈറ്റ് ലീഗിലേക്ക് എത്താൻ ലക്ഷ്യമിടുന്ന ടീമാണ്.

അടിത്തട്ടിൽ നിന്ന് പരിശീലക കരിയർ കെട്ടിപ്പടുക്കാനുള്ള ഇനിയേസ്റ്റയുടെ ദീർഘകാല പദ്ധതിയുടെ ഭാഗമാണ് ഈ നിയമനം. ഇതൊരു താൽക്കാലികമായ കാര്യമല്ലെന്നും അദ്ദേഹം വ്യക്തമാക്കിയിട്ടുണ്ട്.

നേരത്തെ 2026-ലെ ലോകകപ്പിന് മുന്നോടിയായി മൊറോക്കോ ദേശീയ ടീമിൽ 42-കാരനായ ഇനിയേസ്റ്റയ്ക്ക് അവസരം ലഭിക്കുമെന്ന് അഭ്യൂഹങ്ങൾ ഉയർന്നിരുന്നുവെങ്കിലും, ആ ചർച്ചകൾ മുന്നോട്ട് പോയില്ല.