പാരീസ് സെന്റ് ജെർമെയ്ൻ (പിഎസ്‌ജി) വിടാൻ ദക്ഷിണ കൊറിയൻ മിഡ്‌ഫീൽഡർ കാങ്-ഇൻ ലീ ഒരുങ്ങുന്നു. താരത്തെ സ്വന്തമാക്കാനുള്ള നീക്കങ്ങളിൽ അത്ലറ്റിക്കോ മാഡ്രിഡ് വലിയ പുരോഗതി കൈവരിച്ചതായാണ് പുതിയ റിപ്പോർട്ടുകൾ വ്യക്തമാക്കുന്നത്.

റോമെയ്ൻ കോളെറ്റ്-ഗൗഡിന്റെ റിപ്പോർട്ട് പ്രകാരം, കാങ്-ഇൻ ലീയുമായും അദ്ദേഹത്തിന്റെ പ്രതിനിധികളുമായും അത്ലറ്റിക്കോ മാഡ്രിഡ് പ്രാഥമിക ധാരണയിൽ എത്തിയിട്ടുണ്ട്. ഏകദേശം 30 മില്യൺ യൂറോയും ബോണസുകളും നൽകിയാൽ താരത്തെ വിട്ടുനൽകാൻ പിഎസ്‌ജി തയ്യാറായേക്കുമെന്നും റിപ്പോർട്ടിൽ പറയുന്നു.

വിന്റർ ട്രാൻസ്ഫർ വിൻഡോയിൽ താരത്തെ സ്വന്തമാക്കാൻ സാധിക്കാതെ വന്നതിന് പിന്നാലെയാണ് അത്ലറ്റിക്കോ മാഡ്രിഡ് 25-കാരനായ താരത്തിൽ വീണ്ടും താൽപ്പര്യം പ്രകടിപ്പിച്ചത്. പാരീസ് സെന്റ് ജെർമെയ്നുമായുള്ള ചർച്ചകൾക്ക് മുൻപായി താരവുമായി കരാർ ഉണ്ടാക്കാനാണ് സ്പാനിഷ് ക്ലബ് ശ്രമിക്കുന്നത്.

കരാർ നടപടികൾ പൂർത്തിയായിട്ടില്ലെങ്കിലും, പിഎസ്‌ജിയുടെ ആവശ്യപ്പെടുന്ന തുകയുമായി അടുക്കാൻ അത്ലറ്റിക്കോയ്ക്ക് സാധിക്കുന്നുണ്ട്. നേരത്തെ 25 മില്യൺ യൂറോ വാഗ്ദാനം ചെയ്ത അത്ലറ്റിക്കോയ്ക്ക് മറുപടിയായി 35 മില്യൺ യൂറോയാണ് ഫ്രഞ്ച് ചാമ്പ്യൻമാർ ആവശ്യപ്പെട്ടിരുന്നത്.

പരിശീലകൻ ലൂയിസ് എൻറിക്കെയുടെ കീഴിൽ സ്ഥിരമായി ആദ്യ ഇലവനിൽ സ്ഥാനം ലഭിക്കാത്തതും, ചാമ്പ്യൻസ് ലീഗിൽ ഒരു മത്സരത്തിൽ പോലും സ്റ്റാർട്ടിങ് ഇലവനിൽ ഇടംപിടിക്കാത്തതും കാങ്-ഇൻ ലീയുടെ ഭാവിയെക്കുറിച്ചുള്ള അഭ്യൂഹങ്ങൾ വർധിപ്പിച്ചിരുന്നു. കരാർ പൂർത്തിയായാൽ അന്റോയിൻ ഗ്രീസ്മാന്റെ ദീർഘകാല പകരക്കാരനായി കാങ്-ഇൻ ലീയെ വളർത്താനാണ് അത്ലറ്റിക്കോ മാഡ്രിഡ് ലക്ഷ്യമിടുന്നത്.