ബാഴ്‌സലോണ അക്കാദമിയിൽ മികച്ച പ്രകടനം കാഴ്ചവെച്ച കൗമാര താരം ഹംസ അബ്ദുൽക്കരീമിനെ സ്ഥിരമായി ടീമിലെടുക്കാൻ ബാഴ്‌സലോണ തീരുമാനിച്ചു. താരത്തെ സ്വന്തമാക്കാനുള്ള പർച്ചേസ് ഓപ്ഷൻ ഉപയോഗിക്കുമെന്ന് ബാഴ്‌സലോണ അൽ അഹ്ലിയെ ഔദ്യോഗികമായി അറിയിച്ചു.

കരാറിലുള്ള നിശ്ചിത ബൈ-ക്ലോസ് തുക നൽകി താരത്തെ സ്വന്തമാക്കാനാണ് ബാഴ്‌സലോണയുടെ നീക്കം. 1.5 ദശലക്ഷം യൂറോ മുതൽ 3 ദശലക്ഷം യൂറോ വരെയായിരിക്കും ഈ ട്രാൻസ്ഫറിനായി ചെലവാകുക.

പ്രകടനത്തിന്റെ അടിസ്ഥാനത്തിലുള്ള ആഡ്-ഓണുകൾ ഉൾപ്പെടെ കൈമാറ്റത്തുക 5 ദശലക്ഷം യൂറോ വരെ ഉയർന്നേക്കാം. ഭാവിയിൽ താരം മറ്റൊരു ക്ലബ്ബിലേക്ക് മാറുകയാണെങ്കിൽ അതിന്റെ 15 ശതമാനം തുക അൽ അഹ്ലിക്ക് ലഭിക്കുന്ന സെൽ-ഓൺ ക്ലോസും കരാറിലുണ്ട്.

ഇക്കാര്യം ക്ലബ്ബ് അധികൃതർ സ്ഥിരീകരിച്ചിട്ടുണ്ട്. കരാർ നടപടികൾ പൂർത്തിയാക്കുന്നതിനുള്ള നിയമപരമായ രേഖകൾ തയ്യാറാക്കി വരികയാണ്.

കഴിഞ്ഞ കുറച്ചു മാസങ്ങളായി ഹംസ അബ്ദുൽക്കരീം നടത്തിയ മിന്നുന്ന മുന്നേറ്റമാണ് ബാഴ്‌സലോണയെ പെട്ടെന്നൊരു തീരുമാനത്തിലേക്ക് നയിച്ചത്. 2026 ഫിഫ ലോകകപ്പിന് മുന്നോടിയായി ഈജിപ്ത് സീനിയർ ദേശീയ ടീമിലേക്ക് 18-കാരനായ താരം അപ്രതീക്ഷിതമായി വിളിക്കപ്പെട്ടിരുന്നു. ഇത് താരത്തിന്റെ മൂല്യവും ശ്രദ്ധയും വർദ്ധിപ്പിച്ചു.

ജനുവരിയിൽ ലോൺ അടിസ്ഥാനത്തിൽ എത്തിയ താരം ബാഴ്‌സലോണയുടെ യുവനിരയിൽ മികച്ച പ്രകടനമാണ് നടത്തിയത്. രജിസ്ട്രേഷനിൽ ചെറിയ കാലതാമസം നേരിട്ടെങ്കിലും, ബാഴ്‌സലോണയുടെ ജൂവനിൽ എ ടീമിനായി കളിച്ച നാല് മത്സരങ്ങളിൽ നിന്ന് ആറ് ഗോളുകൾ താരം നേടി.

ഹംസയുടെ ശാരീരികക്ഷമതയും പരമ്പരാഗത സ്ട്രൈക്കർക്കുള്ള ഗുണങ്ങളും ബാഴ്‌സലോണ പരിശീലകൻ ഹാൻസി ഫ്ലിക്കിനെ ആകർഷിച്ചിട്ടുണ്ട്. ഈ വേനൽക്കാലത്തെ പ്രീ-സീസൺ ക്യാമ്പിൽ താരത്തെ ഉൾപ്പെടുത്തുന്ന കാര്യം ഫ്ലിക്ക് പരിഗണിക്കുന്നുണ്ടെന്നാണ് റിപ്പോർട്ടുകൾ.