റോബർട്ട് ലെവൻഡോവ്സ്കിക്ക് പകരക്കാരനെ തേടി ബാഴ്സലോണ; പരിഗണനയിൽ മൂന്ന് സൂപ്പർ താരങ്ങൾ
ഈ സീസണിന് ശേഷം ബാഴ്സലോണ വിടുമെന്ന് റോബർട്ട് ലെവൻഡോവ്സ്കി പ്രഖ്യാപിച്ചതോടെ, അദ്ദേഹത്തിന് പകരമായി ജൂലിയൻ അൽവാരസ്, ജോവാ പെഡ്രോ, ഹാരി കെയിൻ എന്നിവരെ ക്ലബ്ബ് നോട്ടമിട്ടതായി മുണ്ടോ ഡിപോർട്ടീവോ റിപ്പോർട്ട് ചെയ്യുന്നു.
സാമ്പത്തിക പ്രതിസന്ധികൾ നിലനിൽക്കുന്നുണ്ടെങ്കിലും, ഈ മൂന്ന് സ്ട്രൈക്കർമാരെയും സ്വന്തമാക്കാനുള്ള ശ്രമങ്ങൾ ബാഴ്സലോണ കൈവിട്ടിട്ടില്ല.
ജൂലിയൻ അൽവാരസിനാണ് ബാഴ്സലോണ മുൻഗണന നൽകുന്നത്. എന്നാൽ താരത്തെ വിട്ടുനൽകാൻ അത്ലറ്റിക്കോ മാഡ്രിഡ് തയ്യാറല്ല. അർജന്റീന താരത്തിന് ക്ലബ്ബ് വിടേണ്ടി വന്നാൽ പിഎസ്ജി ഉൾപ്പെടെയുള്ള മറ്റ് ടീമുകളെക്കാൾ ക്യാമ്പ് നൗവിലേക്ക് ചേക്കേറാനാണ് താൽപ്പര്യമെന്നാണ് വിവരം.
ജോവാ പെഡ്രോയെ രണ്ടാം പദ്ധതിയായാണ് ബാഴ്സലോണ കാണുന്നത്. ക്ലബ്ബ് സ്പോർട്ടിംഗ് ഡയറക്ടർ ഡെക്കോ ഇതിനകം തന്നെ താരത്തിന്റെ പ്രതിനിധികളുമായി ചർച്ചകൾ ആരംഭിച്ചിട്ടുണ്ട്. ലാ ലിഗ ചാമ്പ്യൻമാരായ ബാഴ്സലോണയിലേക്ക് ചേക്കേറുന്നതിൽ ബ്രസീലിയൻ ഫോർവേഡിന് വലിയ ആവേശമാണുള്ളത്.
ഹാരി കെയിനെ സംബന്ധിച്ച് ഇതൊരു ബുദ്ധിമുട്ടേറിയ നീക്കമായിരിക്കും. താരം ബുണ്ടസ്ലിഗ ചാമ്പ്യൻമാരായ ബയേൺ മ്യൂണിക്ക് വിടാൻ താൽപ്പര്യം പ്രകടിപ്പിച്ചിട്ടില്ല. ഈ സീസണിൽ മികച്ച പ്രകടനം പുറത്തെടുക്കുന്ന താരം ഇതുവരെ എല്ലാ മത്സരങ്ങളിലുമായി 58 ഗോളുകളും ഏഴ് അസിസ്റ്റുകളും നേടിയിട്ടുണ്ട്.