ജോഷ് ഡാസിൽവ, റിക്കോ ഹെൻറി, മത്തിയാസ് ജെൻസൺ എന്നീ മൂന്ന് പ്രധാന താരങ്ങളുടെ കരാർ കാലാവധി ബ്രെന്റ്ഫോർഡ് നീട്ടി. 2026/27 സീസൺ അവസാനം വരെയാണ് ക്ലബ്ബ് ഇവരുമായി കരാർ പുതുക്കിയത്.

കഴിഞ്ഞ കുറച്ചു വർഷങ്ങളായി ബ്രെന്റ്ഫോർഡിന്റെ വളർച്ചയിൽ ഈ മൂന്ന് താരങ്ങളും വലിയ പങ്കുവഹിച്ചിട്ടുണ്ട്. 2021-ൽ ക്ലബ്ബിനെ പ്രീമിയർ ലീഗിലേക്ക് ഉയർത്തുന്നതിലും, പിന്നീട് പ്രീമിയർ ലീഗിൽ ടീമിന്റെ സ്ഥാനം ഭദ്രമാക്കുന്നതിലും ഇവർ നിർണ്ണായകമായി.

ആഴ്സണൽ അക്കാദമിയിൽ നിന്നുള്ള താരമായ ഡാസിൽവ 2018-ലാണ് ബ്രെന്റ്ഫോർഡിൽ ചേർന്നത്. എല്ലാ ടൂർണമെന്റുകളിലുമായി 157 മത്സരങ്ങളിൽ കളിച്ച താരം 22 ഗോളുകൾ നേടുകയും 12 ഗോളുകൾക്ക് വഴിയൊരുക്കുകയും ചെയ്തു.

2016-ൽ വാൾസോളിൽ നിന്ന് എത്തിയ ഹെൻറി ക്ലബ്ബിലെ തന്റെ പത്താം സീസണിലാണ്. 239 മത്സരങ്ങളിൽ ബ്രെന്റ്ഫോർഡിനായി ബൂട്ടണിഞ്ഞ അദ്ദേഹം, പ്രീമിയർ ലീഗിൽ 100 മത്സരങ്ങൾ പൂർത്തിയാക്കി. ലോകകപ്പ് യോഗ്യതാ മത്സരത്തിൽ ജമൈക്കയ്ക്ക് വേണ്ടിയും അദ്ദേഹം അരങ്ങേറ്റം കുറിച്ചിട്ടുണ്ട്.

2019-ൽ സെൽറ്റ വിഗോയിൽ നിന്ന് എത്തിയ ജെൻസൺ മധ്യനിരയിലെ പ്രധാന സാന്നിധ്യമാണ്. ബ്രെന്റ്ഫോർഡിനായി 250-ലധികം മത്സരങ്ങൾ പൂർത്തിയാക്കിയ ഈ ഡെന്മാർക്ക് താരം 17 ഗോളുകളും 32 അസിസ്റ്റുകളും തന്റെ പേരിൽ കുറിച്ചിട്ടുണ്ട്.