ഫുട്ബോൾ കരിയർ അവസാനിപ്പിച്ച് ജെയിംസ് മിൽനർ; വിരമിക്കൽ പ്രഖ്യാപിച്ചു
പ്രീമിയർ ലീഗ് ഫുട്ബോളിലെ വെറ്ററൻ മിഡ്ഫീൽഡർ ജെയിംസ് മിൽനർ കരിയർ അവസാനിപ്പിക്കാൻ തീരുമാനിച്ചു. 40-ാം വയസ്സിൽ ഫുട്ബോളിനോട് വിടപറയാനാണ് താരത്തിന്റെ തീരുമാനം. സ്കൈ സ്പോർട്സ് റിപ്പോർട്ട് ചെയ്തതനുസരിച്ച്, ഈ സമ്മറിൽ ബ്രൈട്ടൺ ക്ലബ് മിൽനർക്ക് ഒരു വർഷത്തെ കരാർ നീട്ടിനൽകാൻ തയ്യാറായിരുന്നു. എന്നാൽ, താരം ഈ വാഗ്ദാനം നിരസിക്കുകയായിരുന്നു.
തന്റെ അനുഭവസമ്പത്ത് ടീമിന് ഗുണകരമാകുമെന്ന് കരുതിയാണ് ബ്രൈട്ടൺ മിൽനറുമായി ചർച്ചകൾ നടത്തിയത്. എന്നാൽ പ്രൊഫഷണൽ ഫുട്ബോളിൽ നിന്ന് വിരമിക്കാൻ ഇത് ഉചിതമായ സമയമാണെന്ന് മിൽനർ തീരുമാനിക്കുകയായിരുന്നു.
ജൂൺ ഒന്നിന് തിങ്കളാഴ്ച രാവിലെയാണ് മിൽനർ തന്റെ വിരമിക്കൽ പ്രഖ്യാപനം നടത്തിയത്. ഇതോടെ റെക്കോർഡുകൾ നിറഞ്ഞ തന്റെ പ്രീമിയർ ലീഗ് കരിയറിന് അദ്ദേഹം തിരശ്ശീലയിട്ടു. പ്രീമിയർ ലീഗിൽ ഏറ്റവും കൂടുതൽ മത്സരങ്ങൾ കളിച്ച താരമെന്ന റെക്കോർഡും മിൽനറിന്റെ പേരിലുണ്ട്.
ഗാരെത്ത് ബാറിയുടെ 653 മത്സരങ്ങളെന്ന റെക്കോർഡ് മറികടന്നാണ് ഈ സീസണിൽ മിൽനർ ചരിത്രം കുറിച്ചത്. ലീഗ് ചരിത്രത്തിലെ ഏറ്റവും കൂടുതൽ മത്സരങ്ങൾ കളിച്ച താരം എന്ന ബഹുമതിയോടെയാണ് അദ്ദേഹം കളം വിടുന്നത്.
ലീഡ്സ് യുണൈറ്റഡ്, ന്യൂകാസിൽ, ആസ്റ്റൺ വില്ല, മാഞ്ചസ്റ്റർ സിറ്റി, ലിവർപൂൾ, ബ്രൈട്ടൺ എന്നീ ക്ലബ്ബുകൾക്ക് വേണ്ടി മിൽനർ ബൂട്ടണിഞ്ഞു. കൂടാതെ സ്വിൻഡണിന് വേണ്ടിയും താരം ലോണിൽ കളിച്ചിട്ടുണ്ട്.