മാഞ്ചസ്റ്റർ യുണൈറ്റഡിന്റെ ആധുനിക ചരിത്രത്തിലെ ഏറ്റവും പ്രയാസകരമായ കാലഘട്ടത്തിലൂടെയാണ് ടീം കടന്നുപോയത്. പ്രീമിയർ ലീഗിൽ 15-ാം സ്ഥാനത്ത് ഫിനിഷ് ചെയ്ത യുണൈറ്റഡ്, യുവേഫ യൂറോപ്പ ലീഗ് ഫൈനലിൽ തോൽക്കുകയും ചെയ്തതോടെ യൂറോപ്യൻ ഫുട്ബോൾ യോഗ്യത നഷ്ടമാവുകയും ചെയ്തു.

കഴിഞ്ഞ വേനൽക്കാലത്ത് മറ്റ് ക്ലബ്ബുകളിൽ നിന്ന് താൽപ്പര്യങ്ങൾ ഉണ്ടായിരുന്നുവെങ്കിലും, മാഞ്ചസ്റ്ററിൽ തന്റെ ഏറ്റവും വലിയ ലക്ഷ്യങ്ങൾ കൈവരിക്കാൻ ആഗ്രഹിക്കുന്നതിനാൽ ക്ലബ്ബ് വിട്ടുപോകുക എന്നത് ഒരിക്കലും തന്റെ മുൻഗണനയായിരുന്നില്ലെന്ന് ഫെർണാണ്ടസ് പറയുന്നു.

“യൂറോപ്യൻ ഫൈനൽ തോറ്റതും പ്രീമിയർ ലീഗിലെ ചരിത്രത്തിലെ ഏറ്റവും മോശം പ്രകടനം കാഴ്ചവെച്ചതും കാരണം ക്ലബ്ബ് വലിയൊരു പ്രതിസന്ധിയിലായിരുന്നു.

ആറ് വർഷം മുമ്പ്, ക്ലബ്ബ് എന്നിൽ വിശ്വാസമർപ്പിച്ച് ഇവിടെ എത്തിച്ചു. അന്ന് ഞാൻ ഇവിടെ എത്തിയത് എന്റെ സ്വപ്നങ്ങൾ പൂർത്തീകരിക്കാനാണ്. എന്നാൽ ഞാൻ ഉദ്ദേശിച്ചതൊന്നും ഇവിടെ സാധ്യമായിട്ടില്ല.

പ്രീമിയർ ലീഗും ചാമ്പ്യൻസ് ലീഗും ഈ ക്ലബ്ബിനൊപ്പം നേടണമെന്ന് ഞാൻ എപ്പോഴും ആഗ്രഹിച്ചിട്ടുണ്ട്. അത് സാധ്യമാകുമോ ഇല്ലയോ എന്ന് അറിയില്ല. പക്ഷേ, അതിനുള്ള അവസരം ലഭിക്കുന്നതുവരെ അല്ലെങ്കിൽ ഞാൻ ഇവിടെ തുടരുന്നിടത്തോളം കാലം ഞാൻ അതിനായി ശ്രമിച്ചുകൊണ്ടേയിരിക്കും.

ഇതൊരു വലിയ വെല്ലുവിളിയാണോ? തീർച്ചയായും. വർഷങ്ങളായി സ്ഥിരതയോടെ വിജയിക്കുന്ന വലിയ ക്ലബ്ബുകൾ ലീഗിലുണ്ട്. നമ്മൾ നിലവിൽ അത്രയും കരുത്തർ അല്ലാത്തതുകൊണ്ട് ഇത് വളരെ ബുദ്ധിമുട്ടേറിയ കാര്യമാണ്,” ബ്രൂണോ ഫെർണാണ്ടസ് കൂട്ടിച്ചേർത്തു.