പ്രീമിയർ ലീഗിൽ 50 ഗോളുകളും 50 അസിസ്റ്റുകളും തികയ്ക്കുന്ന മൂന്നാമത്തെ അർസനൽ താരമായി ബുകായോ സാക്ക മാറി. അർസനൽ ക്ലബ്ബിന്റെ ചരിത്രത്തിൽ തൻ്റേതായ സ്ഥാനം ഉറപ്പിച്ചാണ് ഈ യുവതാരം പുതിയ നേട്ടം സ്വന്തമാക്കിയത്.

ബേൺലിക്കെതിരായ മത്സരത്തിൽ അർസനൽ 1-0 എന്ന സ്‌കോറിന് വിജയിച്ചപ്പോൾ, കൈ ഹാവെർട്‌സിന്റെ വിജയഗോളിന് വഴിയൊരുക്കിയത് 24-കാരനായ സാക്കയാണ്. ഈ അസിസ്റ്റോടെയാണ് അദ്ദേഹം പ്രീമിയർ ലീഗിലെ അസിസ്റ്റ് നേട്ടം 50-ൽ എത്തിച്ചത്.

ഇതോടെ അർസനൽ ഇതിഹാസങ്ങളായ ഡെന്നിസ് ബെർഗ്‌കാംപ്, തിയറി ഹെൻറി എന്നിവർക്കൊപ്പം പ്രീമിയർ ലീഗ് കാലഘട്ടത്തിൽ ഈ നേട്ടം കൈവരിക്കുന്ന താരങ്ങളുടെ പട്ടികയിൽ സാക്കയും ഇടംനേടി.