തന്റെ കരിയറിലെ വളർച്ചയിൽ പരിശീലകൻ മിക്കൽ അർടെറ്റ വഹിച്ച നിർണായക പങ്കിനെക്കുറിച്ച് തുറന്നുപറഞ്ഞ് ആഴ്‌സണൽ താരം ബുക്കായോ സാക്ക. ആഴ്‌സണലിലെ ഏറ്റവും അപകടകാരിയായ മുന്നേറ്റനിര താരങ്ങളിൽ ഒരാളായി താൻ മാറിയതിന് പിന്നിൽ അർടെറ്റയുടെ പരിശീലനരീതികളാണെന്ന് സാക്ക പറഞ്ഞു.

അർടെറ്റയുടെ മാർഗ്ഗനിർദ്ദേശങ്ങൾക്ക് കീഴിൽ മികച്ച ഫോമിലാണ് സാക്ക ഇപ്പോൾ കളിക്കുന്നത്. പരിശീലകന്റെ വിശ്വാസവും നേതൃപാടവവുമാണ് തന്റെ കരിയറിലെ ഈ ഉയർച്ചയ്ക്ക് പ്രധാന കാരണമെന്ന് താരം വ്യക്തമാക്കി.

അർടെറ്റയുടെ പരിശീലന രീതികളെയും വ്യക്തിപരമായ സമീപനത്തെയും പ്രശംസിച്ച ഇംഗ്ലണ്ട് താരം, തങ്ങൾ തമ്മിലുള്ള ശക്തമായ ബന്ധത്തെക്കുറിച്ചും വാചാലനായി.

“അദ്ദേഹത്തിന് അതിശയകരമായ ആശയങ്ങളാണുള്ളത്, മികച്ചൊരു പരിശീലകൻ തന്നെയാണ് അദ്ദേഹം. അദ്ദേഹത്തോട് സംസാരിച്ചാൽ ആർക്കും ആ ആശയങ്ങളോട് ചേർന്നുപോകാൻ തോന്നും. അത്രത്തോളം കാര്യങ്ങൾ ബോധ്യപ്പെടുത്താൻ അദ്ദേഹത്തിന് കഴിയുന്നുണ്ട്. അദ്ദേഹം എന്നോട് വ്യക്തിപരമായി അടുത്തുനിൽക്കുന്നു. എന്നെയും എന്റെ കുടുംബത്തെയും അദ്ദേഹത്തിന് നന്നായി അറിയാം. ആ ഒരു ബന്ധം എനിക്ക് വലിയൊരു പിന്തുണയാണ് നൽകുന്നത്,” ബുക്കായോ പറഞ്ഞു.

എപ്പോഴും ആഴ്‌സണലിൽ തന്നെ തുടരാൻ ആയിരുന്നോ ആഗ്രഹിച്ചത് എന്ന ചോദ്യത്തിന് “തീർച്ചയായും” എന്നായിരുന്നു സാക്കയുടെ മറുപടി.