പ്രീമിയർ ലീഗിലെ ഈ സീസണിലെ അവസാന മത്സരത്തിനായി മാഞ്ചസ്റ്റർ യുണൈറ്റഡ് ഒരുങ്ങുന്നു. ബ്രൈറ്റണിനെതിരായ പോരാട്ടത്തിന് മുന്നോടിയായി മാഞ്ചസ്റ്റർ യുണൈറ്റഡ് ഹെഡ് കോച്ച് മൈക്കൽ കാരിക് മാധ്യമങ്ങളോട് സംസാരിച്ചു. ടീമിന്റെ പ്രകടനത്തിൽ സന്തുലിതാവസ്ഥയും പ്രൊഫഷണലിസവും നിലനിർത്തേണ്ടതിന്റെ പ്രാധാന്യത്തെക്കുറിച്ച് അദ്ദേഹം ഊന്നിപ്പറഞ്ഞു.

ഈ സീസണിൽ നേരത്തെ തന്നെ ചാമ്പ്യൻസ് ലീഗ് യോഗ്യതയും പോയിന്റ് പട്ടികയിൽ മൂന്നാം സ്ഥാനവും ഉറപ്പിക്കാൻ മാഞ്ചസ്റ്റർ യുണൈറ്റഡിന് സാധിച്ചിരുന്നു. അതിനാൽ, ടീമിൽ ചില മാറ്റങ്ങൾ വരുത്താനും കുറഞ്ഞ അവസരങ്ങൾ മാത്രം ലഭിച്ച കളിക്കാർക്ക് അവസരം നൽകാനും കാരിക്ക് ഈ മത്സരത്തിൽ മുൻഗണന നൽകുന്നു.

“ഈ മത്സരം ജയിക്കാൻ തന്നെയാണ് ഞങ്ങൾ ഇവിടെ എത്തിയിരിക്കുന്നത്. ഇതൊരു കടുപ്പമേറിയ പോരാട്ടമാണ്. ടീമിനെയും സ്ക്വാഡിനെയും തിരഞ്ഞെടുക്കുമ്പോൾ സന്തുലിതാവസ്ഥ നിലനിർത്തേണ്ടതുണ്ട്,” കാരിക് വ്യക്തമാക്കി.

“ശക്തമായ ടീമുമായാണ് ഞങ്ങൾ ഇവിടെ എത്തിയിരിക്കുന്നത്. താരങ്ങളെല്ലാം മത്സരത്തിൽ പൂർണ്ണ ശ്രദ്ധ കേന്ദ്രീകരിച്ചിരിക്കുന്നു. ഈ ക്ലബ്ബിനായി കളിക്കുമ്പോൾ അതൊരു ഉത്തരവാദിത്തമാണ്. എവിടെ മത്സരിച്ചാലും മികച്ച പ്രകടനം പുറത്തെടുക്കാൻ ബാധ്യസ്ഥരാണ്,” എന്നും അദ്ദേഹം കൂട്ടിച്ചേർത്തു.