ചെൽസിയുടെ പുതിയ പരിശീലകനായി സാബി അലോൺസോയെ എത്തിക്കാൻ നീക്കവുമായി ക്ലബ്ബ്

ചെൽസിയുടെ പുതിയ ഹെഡ് കോച്ചായി സാബി അലോൺസോയെ നിയമിക്കാൻ കഴിയുമെന്ന പ്രതീക്ഷയിലാണ് ക്ലബ്ബ് അധികൃതരെന്ന് ‘ദി ഗാർഡിയൻ’ റിപ്പോർട്ട് ചെയ്യുന്നു. പുതിയ പരിശീലക സ്ഥാനത്തേക്കുള്ള പരിഗണനയിൽ അലോൺസോയാണ് നിലവിൽ മുന്നിലുള്ളത്. മുൻ ബയർ ലെവർകുസൻ, റയൽ മാഡ്രിഡ് പരിശീലകനുമായി ചെൽസി അധികൃതർ പ്രാഥമിക ചർച്ചകൾ നടത്തിക്കഴിഞ്ഞു.

ചെൽസിയുടെ യുവനിരയ്ക്ക് യോജിച്ച ശൈലിയാണ് അലോൺസോയുടേതെന്ന് ക്ലബ്ബ് വിലയിരുത്തുന്നു. ഒരു മികച്ച താരമായിരുന്ന കാലത്ത് നേടിയ നേട്ടങ്ങളും കരിയറിലെ അനുഭവസമ്പത്തും ഡ്രസിങ് റൂമിൽ താരങ്ങളുടെ ഇടയിൽ അദ്ദേഹത്തിന് അർഹമായ ബഹുമാനം നേടിക്കൊടുക്കുമെന്നും ക്ലബ്ബ് കണക്കുകൂട്ടുന്നു.

ലിവർപൂളിലെ മുൻകാല ബന്ധം കാരണം അലോൺസോ ആൻഫീൽഡിലേക്ക് തിരിച്ചെത്തുമെന്ന അഭ്യൂഹങ്ങൾ ഉയരുന്നുണ്ട്. എന്നാൽ, ലിവർപൂളിന് നിലവിലെ പരിശീലകൻ ആർനെ സ്ലോട്ടിനെ പുറത്താക്കാൻ പദ്ധതിയില്ലെന്നാണ് വിവിധ സ്രോതസ്സുകൾ വ്യക്തമാക്കുന്നത്.

അതേസമയം, അലോൺസോയ്ക്ക് പുറമെ മറ്റ് ചില പേരുകളും ചെൽസിയുടെ പരിഗണനയിലുണ്ട്. ഇതിൽ പ്രധാനപ്പെട്ടത് അൻഡോണി ഇറോളയാണ്. ബോൺമൗത്ത് വിടുന്ന ഇറോളയുമായി ചെൽസി ചർച്ചകൾ നടത്തിയിട്ടുണ്ട്. ഒരു വലിയ ക്ലബ്ബിന്റെ ഉത്തരവാദിത്തം ഏറ്റെടുക്കാൻ അദ്ദേഹം തയ്യാറാണെന്ന വിലയിരുത്തലിലാണ് ചെൽസി മാനേജ്‌മെന്റ്.