മുൻ ചെൽസി പരിശീലകൻ തോമസ് ടുക്കൽ പ്രഖ്യാപിച്ച 26 അംഗ ഇംഗ്ലണ്ട് ലോകകപ്പ് ടീമിൽ ഇടംപിടിക്കാത്തതിനെക്കുറിച്ച് മനസ്സ് തുറന്ന് കോൾ പാമർ. ലോകകപ്പ് ടീമിൽ നിന്ന് തന്നെ ഒഴിവാക്കിയതിനെക്കുറിച്ചുള്ള നിശബ്ദതയാണ് താരം വെടിഞ്ഞത്.

കഴിഞ്ഞ കുറച്ചു വർഷങ്ങൾക്കിടയിലുള്ള തൻ്റെ ആദ്യ വേനൽക്കാല അവധിക്കാലം പരമാവധി ആസ്വദിക്കാനാണ് ഈ ചെൽസി താരം തീരുമാനിച്ചിരിക്കുന്നത്. അതിനുശേഷം പ്രീ-സീസൺ പരിശീലനത്തിനായി ടീമിനൊപ്പം ചേരുമെന്നും അദ്ദേഹം വ്യക്തമാക്കി.

“കഴിഞ്ഞ മൂന്നോ നാലോ വർഷത്തിനിടെ ആദ്യമായാണ് എനിക്ക് ഇത്തരത്തിൽ വിശ്രമം ലഭിക്കുന്നത്. ഈ വേനൽക്കാലത്ത് ഞാൻ നന്നായി വിശ്രമിക്കും. അതിനുശേഷം എനിക്ക് ഏറ്റവും ഇഷ്ടപ്പെട്ട കാര്യത്തിലേക്ക് ഞാൻ മടങ്ങിയെത്തും,” പാമർ ഐ-ഡി (i-D) യോട് പറഞ്ഞു.

“ഈ സീസൺ അത്ര മികച്ചതായിരുന്നില്ല, പക്ഷേ കാര്യങ്ങൾ അങ്ങനെയാണല്ലോ. മാറ്റാൻ കഴിയാത്ത ഒരു തീരുമാനത്തെക്കുറിച്ച് ഓർത്ത് ഞാൻ വിലപിക്കുന്നില്ല. ടീമിലുള്ളവർ മികച്ച പ്രകടനം നടത്തി മുന്നേറുമെന്ന് തന്നെയാണ് ഞാൻ കരുതുന്നത്,” അദ്ദേഹം കൂട്ടിച്ചേർത്തു.

സീസണിൻ്റെ ആദ്യ പകുതിയിൽ പാമർ തുടർച്ചയായി ഗ്രോയിൻ സംബന്ധമായ പരിക്കുകളെത്തുടർന്ന് ബുദ്ധിമുട്ടിയിരുന്നു. സുഖം പ്രാപിച്ച ശേഷം പഴയ ഫോമിലേക്ക് മടങ്ങിയെത്താൻ താരത്തിന് സാധിച്ചിരുന്നില്ല. ഇതാണ് പാമറെ ടീമിൽ നിന്ന് ഒഴിവാക്കുന്നതിലേക്ക് നയിച്ച പ്രധാന കാരണങ്ങളിലൊന്നായി തോമസ് ടുക്കൽ ചൂണ്ടിക്കാട്ടിയത്.