പിഎസ്‌ജിയുടെ അടുത്ത സീസൺ മികച്ചതായിരിക്കും: ഉസ്മാൻ ഡെംബലെ

വരാനിരിക്കുന്ന ഫുട്ബോൾ സീസണിൽ പിഎസ്‌ജി (PSG) കൂടുതൽ കരുത്തോടെ തിരിച്ചുവരുമെന്ന ആത്മവിശ്വാസം പങ്കുവെച്ച് താരം ഉസ്മാൻ ഡെംബലെ. ഈ സീസണിൽ ചാമ്പ്യൻസ് ലീഗ് വിജയിച്ചതിന് പിന്നാലെയാണ് ടീമിൻ്റെ മുന്നോട്ടുള്ള കുതിപ്പിനെക്കുറിച്ച് ഡെംബലെ പ്രതികരിച്ചത്.

മാർക്കയ്ക്ക് നൽകിയ അഭിമുഖത്തിലാണ് ലൂയിസ് എൻറിക്കെയുടെ പരിശീലനത്തിന് കീഴിൽ പിഎസ്‌ജിക്ക് വലിയ ഉയരങ്ങൾ കീഴടക്കാൻ കഴിയുമെന്ന് ഡെംബലെ വ്യക്തമാക്കിയത്. “പരിശീലകനോ പ്രസിഡന്റോ സ്‌പോർട്ടിംഗ് ഉപദേശകരോ ഞങ്ങൾക്ക് യാതൊരു പരിധികളും നിശ്ചയിച്ചിട്ടില്ല,” ഡെംബലെ പറഞ്ഞു.

“ഓരോ സീസൺ തുടങ്ങുമ്പോഴും എല്ലാ ട്രോഫികളും നേടാനാണ് ഞങ്ങൾ ശ്രമിക്കാറുള്ളത്. ഇത് വളരെ പ്രത്യേകതയുള്ള ഒന്നാണെന്ന് ഞങ്ങൾക്കറിയാം. വളരെ ശക്തരായ ടീമുകൾ ഒപ്പമുണ്ടെങ്കിലും, കഴിഞ്ഞ രണ്ട് വർഷത്തിനിടെ ആ ട്രോഫി നേടാൻ ഞങ്ങൾക്ക് കഴിയുമെന്ന് ഞങ്ങൾ തെളിയിച്ചിട്ടുണ്ട്. ഓരോ മത്സരത്തിലും അത് തെളിയിക്കാൻ ഞങ്ങൾ ശ്രമിക്കുന്നു,” അദ്ദേഹം കൂട്ടിച്ചേർത്തു.

തൻ്റെ പ്രകടനത്തെക്കുറിച്ചും ടീമിനെക്കുറിച്ചും താരം മനസ്സ് തുറന്നു. “ഞങ്ങൾക്ക് ഇനിയും മെച്ചപ്പെടാൻ സാധിക്കും. മികച്ച താരങ്ങളും യുവതാരങ്ങളും ടീമിലുണ്ട്. ലൂയിസ് എൻറിക്കെയ്ക്ക് കീഴിൽ എനിക്ക് വലിയ പുരോഗതി ഉണ്ടായിട്ടുണ്ട്, ഇപ്പോൾ കൂടുതൽ അനുഭവസമ്പത്തും എനിക്കുണ്ട്. ടീമിലെ യുവതാരങ്ങൾക്കും ഇതിനകം മികച്ച അനുഭവപരിചയമുണ്ട്. അവർ ഇനിയും ഏറെ മുന്നേറും. ഞങ്ങൾ ഇനിയും മെച്ചപ്പെടുകയും അടുത്ത സീസണിൽ കൂടുതൽ ശക്തരാകാൻ ശ്രമിക്കുകയും ചെയ്യും,” ഡെംബലെ പറഞ്ഞു.