ലിവർപൂൾ ഗോൾകീപ്പർ ആലിസൺ യുവന്റസിലേക്ക് മാറണമെന്ന് എഡ്വിൻ വാൻ ഡെർ സാർ

ഗസെറ്റ ഡെല്ലോ സ്പോർട്ടിനോട് സംസാരിക്കവെ, യുവന്റസിന്റെ നിലവിലെ ഗോൾകീപ്പിങ് പ്രശ്നങ്ങൾ പരിഹരിക്കാൻ കഴിവുള്ള ഉന്നത നിലവാരമുള്ള താരമാണ് അലിസൺ എന്ന് വാൻ ഡെർ സാർ പറഞ്ഞു.

“അലിസൺ ലോകത്തിലെ തന്നെ മികച്ച ഗോൾകീപ്പർമാരിൽ ഒരാളാണ്. ലിവർപൂളിലെ അദ്ദേഹത്തിന്റെ പ്രകടനം ഞാൻ ശ്രദ്ധിക്കാറുണ്ട്. ട്രാൻസ്ഫർ അഭ്യൂഹങ്ങൾ സ്വാഭാവികമാണ്, എന്നാൽ യുവന്റസ് അദ്ദേഹത്തെ പരിഗണിക്കുന്നുണ്ടെങ്കിൽ അതൊരു മികച്ച തീരുമാനമായിരിക്കും. ഇറ്റലിയിൽ റോമയ്ക്കായി കളിച്ച പരിചയം അലിസണിന് ഗുണകരമാകും,” വാൻ ഡെർ സാർ കൂട്ടിച്ചേർത്തു.

താരത്തിന്റെ പ്രായം യുവന്റസിലെ പ്രകടനത്തെ ബാധിക്കുമോ എന്ന ചോദ്യത്തെയും അദ്ദേഹം തള്ളിക്കളഞ്ഞു. ആധുനിക ഫുട്ബോളിൽ ഗോൾകീപ്പർമാർക്ക് പരിചയസമ്പത്ത് വളരെ പ്രധാനമാണെന്ന് അദ്ദേഹം ചൂണ്ടിക്കാട്ടി.

“അലിസണിന് 34 വയസ്സിനോട് അടുക്കുന്നു എന്നത് ഒരു പ്രശ്നമേയല്ല. ഉയർന്ന തലത്തിൽ കളിക്കുന്ന ഒട്ടേറെ ഗോൾകീപ്പർമാരുണ്ട്. ബുഫൺ 45-ാം വയസ്സിലാണ് വിരമിച്ചത്, ഞാൻ 40-ാം വയസ്സിലാണ് മാഞ്ചസ്റ്റർ യുണൈറ്റഡിനായി അവസാന സീസൺ കളിച്ചത്. ആത്മവിശ്വാസവും ശാന്തതയുമാണ് ഇവിടെ പ്രധാനം,” വാൻ ഡെർ സാർ വ്യക്തമാക്കി.