ഫിഫ പ്രസിഡന്റ് ജിയാനി ഇൻഫാന്റിനോയ്‌ക്കെതിരെ സമർപ്പിച്ചിരിക്കുന്ന നൈതിക പരാതിയിൽ അടിയന്തര നടപടി സ്വീകരിക്കണമെന്ന് ആവശ്യപ്പെട്ട് 50 യൂറോപ്യൻ പാർലമെന്റ് അംഗങ്ങൾ (MEPs) ഫിഫയ്ക്ക് കത്തയച്ചു. 2025 ഡിസംബറിൽ അമേരിക്കൻ പ്രസിഡന്റ് ഡൊണാൾഡ് ട്രംപിന് ഫിഫ പീസ് പ്രൈസ് നൽകാൻ ഇൻഫാന്റിനോ തീരുമാനിച്ചതാണ് ഈ വിവാദത്തിന് തുടക്കമിട്ടതെന്ന് ദി അത്‌ലറ്റിക് റിപ്പോർട്ട് ചെയ്യുന്നു.

ഫിഫയുടെ രാഷ്ട്രീയ നിഷ്പക്ഷത പാലിക്കാനുള്ള ബാധ്യത ഇൻഫാന്റിനോ തുടർച്ചയായി ലംഘിക്കുന്നുവെന്ന് ചൂണ്ടിക്കാട്ടി ഡിസംബറിൽ ഫിഫ എത്തിക്സ് കമ്മിറ്റിക്ക് ഔദ്യോഗിക പരാതി നൽകിയിരുന്നു. മനുഷ്യാവകാശ സംഘടനയായ ഫെയർസ്‌ക്വയറാണ് (FairSquare) ഈ പരാതി സമർപ്പിച്ചത്. ട്രംപിന് ആദ്യമായി ഫിഫ പീസ് പ്രൈസ് നൽകാൻ തീരുമാനിച്ച നടപടിക്രമങ്ങളെക്കുറിച്ച് അന്വേഷണം നടത്തണമെന്നും പരാതിയിൽ ആവശ്യപ്പെടുന്നു.

ഫെയർസ്‌ക്വയർ സമർപ്പിച്ച പരാതി പരിശോധിച്ച് നടപടിയെടുക്കാൻ 50 യൂറോപ്യൻ പാർലമെന്റ് അംഗങ്ങൾ ഫിഫയോട് ആവശ്യപ്പെട്ടു. ഇൻഫാന്റിനോയ്ക്കും ഫിഫ കൗൺസിൽ അംഗങ്ങൾക്കും നേരിട്ടാണ് കത്ത് അയച്ചിരിക്കുന്നത്. ഫിഫ ജനറൽ സെക്രട്ടറി മത്തിയാസ് ഗ്രാഫ്‌സ്ട്രോമിനും ഫിഫയുടെ ഇൻവെസ്റ്റിഗേറ്ററി ചേംബറിനും ഈ കത്തിന്റെ പകർപ്പുകൾ കൈമാറിയിട്ടുണ്ട്.

നീതി, സമത്വം, മാനുഷിക അന്തസ്സ് എന്നിവയോടുള്ള പ്രതിബദ്ധത ഫിഫ കാത്തുസൂക്ഷിക്കുന്നുണ്ടെന്ന് തെളിയിക്കാൻ ഫെയർസ്‌ക്വയറിന്റെ പരാതി പരിശോധിക്കണമെന്ന് നിയമനിർമ്മാതാക്കൾ വ്യക്തമാക്കി. കത്തിന്റെ ഉള്ളടക്കം എല്ലാ ഫിഫ കൗൺസിൽ അംഗങ്ങളെയും അറിയിക്കണമെന്നും അവർ ആവശ്യപ്പെട്ടിട്ടുണ്ട്.

എട്ടു പേജുള്ള കത്താണ് ഫെയർസ്‌ക്വയർ എത്തിക്സ് കമ്മിറ്റിക്ക് നൽകിയത്. ഫിഫയുടെ കോഡ് ഓഫ് എത്തിക്സ് ലംഘനങ്ങൾ അന്വേഷിക്കാൻ ചുമതലപ്പെടുത്തിയ സ്വതന്ത്ര സമിതിയാണിത്. ഇൻഫാന്റിനോ ഫിഫയുടെ നിഷ്പക്ഷതാ ചട്ടം നാല് തവണ ലംഘിച്ചുവെന്ന് പരാതിയിൽ ആരോപിക്കുന്നു.