പ്രീമിയർ ലീഗിലെ പ്രമുഖ ക്ലബ്ബുകളുടെ ശ്രദ്ധാകേന്ദ്രമായി മാറിയ എവർട്ടൺ താരം ഇലിമാൻ എൻഡിയെ താൻ ചാമ്പ്യൻസ് ലീഗിൽ കളിക്കാൻ ആഗ്രഹിക്കുന്നതായി വ്യക്തമാക്കി. 2026 ലോകകപ്പിന് മുന്നോടിയായുള്ള നിർണായകമായ വേനൽക്കാലത്തിന് തയ്യാറെടുക്കുകയാണ് താരം.

ലോകകപ്പിലെ സെനഗലിന്റെ ആദ്യ മത്സരത്തിൽ ഫ്രാൻസിനെതിരെ കളിക്കാനൊരുങ്ങുന്ന എൻഡിയെ, ഫുട്ബോളിലെ ഏറ്റവും വലിയ വേദിയിൽ തന്റെ കഴിവ് തെളിയിക്കാനുള്ള മികച്ച അവസരമായാണ് ഈ ടൂർണമെന്റിനെ കാണുന്നത്.

“ലോകം മുഴുവൻ ലോകകപ്പ് കാണും. അതുകൊണ്ടുതന്നെ ഇതൊരു വലിയ അവസരമാണ്,” എൻഡിയെ പറഞ്ഞു.

മാഞ്ചസ്റ്റർ സിറ്റി, ആഴ്‌സണൽ, മാഞ്ചസ്റ്റർ യുണൈറ്റഡ് തുടങ്ങി നിരവധി വമ്പൻ ക്ലബ്ബുകൾ താല്പര്യം പ്രകടിപ്പിച്ചിട്ടുണ്ടെങ്കിലും, ഉയർന്ന നിലവാരത്തിൽ കളിക്കാനാണ് താൻ ശ്രദ്ധ കേന്ദ്രീകരിക്കുന്നതെന്ന് താരം വ്യക്തമാക്കുന്നു.

“ഫുട്ബോൾ നിങ്ങളെ എവിടേക്കാണ് കൊണ്ടുപോകുന്നതെന്ന് പറയാനാവില്ല. ഞാൻ എപ്പോഴും പറയാറുള്ളതുപോലെ മികച്ച താരമാകാനാണ് ആഗ്രഹം. അതിനായി ഉന്നത നിലവാരത്തിൽ കളിക്കണം. ചാമ്പ്യൻസ് ലീഗ് ഫുട്ബോൾ കളിക്കാനാണ് ഞാൻ ആഗ്രഹിക്കുന്നത്,” അദ്ദേഹം കൂട്ടിച്ചേർത്തു.

ഇംഗ്ലണ്ടിലെയും ഫ്രാൻസിലെയും വിവിധ അക്കാദമികളിൽ നിന്ന് തഴയപ്പെട്ടെങ്കിലും, താൻ എലൈറ്റ് ഫുട്ബോളിലേക്ക് എത്തുമെന്ന് എൻഡിയെ ഒരിക്കലും സംശയിച്ചിരുന്നില്ല.

സൗത്താംപ്ടൺ, ടോട്ടൻഹാം ഹോട്സ്പർ, ചെൽസി, ക്രിസ്റ്റൽ പാലസ് എന്നിവിടങ്ങളിലെ തിരിച്ചടികൾക്ക് ശേഷമാണ് നോൺ-ലീഗ് ഫുട്ബോളിലൂടെ എൻഡിയെ തന്റെ കരിയർ തിരിച്ചുപിടിച്ചത്.

“ഫുട്ബോൾ ഉപേക്ഷിക്കാൻ എനിക്ക് തോന്നിയിട്ടുണ്ടോ? അങ്ങനെയൊന്ന് എന്റെ ചിന്തയിൽ പോലും വന്നിട്ടില്ല. ചെറിയ പ്രായം മുതൽക്കേ എന്റെ കഴിവിൽ എനിക്ക് വലിയ വിശ്വാസമുണ്ടായിരുന്നു,” അദ്ദേഹം പറഞ്ഞു.

ലോകകപ്പിൽ സെനഗൽ കിരീടം നേടുമെന്ന വലിയ ലക്ഷ്യമാണ് എൻഡിയെ പങ്കുവെക്കുന്നത്.

“എന്റെ അഭിപ്രായത്തിൽ ഞങ്ങൾ ലോകകപ്പ് ജയിക്കും. അങ്ങനെയൊന്ന് വിശ്വസിക്കുന്നില്ലെങ്കിൽ പിന്നെ എന്തിനാണ് അവിടെ പോകുന്നത്? ഒരു വിനോദസഞ്ചാരിയാകാനല്ല ഞാൻ പോകുന്നത്, വിജയിക്കാൻ തന്നെയാണ്,” താരം വ്യക്തമാക്കി.

“ഫ്രാൻസ് എന്റെ ജീവിതത്തിന്റെ ഭാഗമാണ്. ഞാൻ ജനിച്ചത് അവിടെയാണ്. എന്റെ കുടുംബം അവിടെ താമസിക്കുന്നു. അമ്മ ഫ്രഞ്ചുകാരിയാണ്. സെനഗലിന് വേണ്ടി കളിക്കുമ്പോഴും ഞാൻ ഒരു ഫ്രഞ്ചുകാരൻ കൂടിയാണ്,” അദ്ദേഹം കൂട്ടിച്ചേർത്തു.

ഈ വൈകാരിക സാഹചര്യത്തിലും, സെനഗലിന്റെ കൂട്ടായ ലക്ഷ്യത്തിൽ മാത്രമാണ് തന്റെ ശ്രദ്ധയെന്ന് എൻഡിയെ ഉറപ്പിച്ചു പറയുന്നു.

“ഞങ്ങൾക്ക് ശക്തമായൊരു ടീമുണ്ട്. അവർ ഞങ്ങളെ നേരിടുമ്പോൾ പേടിക്കുമെന്നാണ് ഞാൻ പ്രതീക്ഷിക്കുന്നത്.”