ഇന്റർ മിലാനിലെ പരിശീലക സ്ഥാനത്തേക്ക് തന്നെ പരിഗണിക്കുന്നുവെന്ന അഭ്യൂഹങ്ങൾ തള്ളി സെസ് ഫാബ്രിഗാസ് രംഗത്ത്. നിലവിൽ കോമോ ക്ലബ്ബിലെ തന്റെ പ്രോജക്റ്റിൽ പൂർണ്ണമായി ശ്രദ്ധ കേന്ദ്രീകരിക്കുകയാണെന്ന് അദ്ദേഹം വ്യക്തമാക്കി.

ക്രിസ്റ്റ്യൻ ചിവുവിനെ നിയമിക്കുന്നതിന് മുൻപ് ഇന്റർ മിലാൻ തന്നെ പരിഗണിച്ചിരുന്നുവെന്ന റിപ്പോർട്ടുകളെക്കുറിച്ച് സ്കൈ സ്പോർട്ടിനോട് സംസാരിക്കുകയായിരുന്നു സ്പാനിഷ് പരിശീലകനായ ഫാബ്രിഗാസ്.

“ഇന്റർ മിലാനുമായുള്ള ബന്ധത്തെക്കുറിച്ചാണോ ചോദിക്കുന്നത്?”

“ഞാൻ ലണ്ടനിൽ നിന്ന് തിരിച്ചെത്തിയ സമയത്തായിരുന്നു അത്. സുവർസോ ഇക്കാര്യം സംസാരിച്ചത് ഞാൻ ഓർക്കുന്നു. കഴിഞ്ഞ വർഷം നടന്ന കാര്യമാണത്. അന്ന് ഇതിനെക്കുറിച്ച് ഒരുപാട് ചർച്ചകൾ നടന്നിരുന്നു, എന്നാൽ ഞാൻ ഒന്നും പറഞ്ഞിരുന്നില്ല. ഇനി ഇതിൽ കൂടുതലായി ഒന്നും പറയാനില്ല. ഞങ്ങൾ എല്ലാവരും മുതിർന്നവരാണ്. ഞാൻ കോമോയിലാണ്, ഞാൻ ഇവിടെ സന്തോഷവാനാണ്, അത്രമാത്രം. ജീവിതം അതിന്റെ വഴിക്ക് പോകുന്നു, എല്ലാവർക്കും മികച്ചതെന്ന് തോന്നുന്ന തീരുമാനങ്ങളാണ് നമ്മൾ എല്ലായ്പ്പോഴും എടുക്കാറുള്ളത്.”

കോമോയിൽ മികച്ചൊരു സീസണാണ് ഫാബ്രിഗാസ് പൂർത്തിയാക്കിയത്. ലീഗിന്റെ അവസാന ദിവസം ചാമ്പ്യൻസ് ലീഗ് യോഗ്യത നേടിക്കൊണ്ട് ടീമിനെ മികച്ചൊരു നേട്ടത്തിലേക്ക് നയിക്കാൻ അദ്ദേഹത്തിന് സാധിച്ചു.