റയൽ മാഡ്രിഡ് പ്രസിഡന്റ് ഫ്ലോറന്റീനോ പെരസ് എതിരാളിയായ എൻറിക് റിക്വെൽമെയ്‌ക്കെതിരെ രൂക്ഷ വിമർശനവുമായി രംഗത്തെത്തി. ക്ലബ്ബിന്റെ നിലനിൽപ്പിനായുള്ള പോരാട്ടമായാണ് ഞായറാഴ്ച നടക്കാനിരിക്കുന്ന തിരഞ്ഞെടുപ്പിനെ പെരസ് വിശേഷിപ്പിച്ചത്.

“കാൽഡെറോണിൽ നിന്നുള്ളവരും ടെബാസിൽ നിന്നുള്ളവരും ഫെഡറേഷനിലുള്ളവരും അടക്കമുള്ള മോശം ആളുകൾ ഒന്നിച്ചുചേർന്നിരിക്കുകയാണ്,” പെരസ് പറഞ്ഞു. “ആ ഇരുണ്ട കാലഘട്ടത്തിൽ നിന്നുള്ളവർ എന്ത് വിലകൊടുത്തും റയൽ മാഡ്രിഡിനെ തിരിച്ചുപിടിക്കാൻ ആഗ്രഹിക്കുന്നു. സ്വന്തം താല്പര്യങ്ങൾക്കായി അവർ ക്ലബ്ബിനെ ഉപയോഗിക്കാൻ നോക്കുകയാണ്.”

ക്ലബ്ബിന് വലിയ സാമ്പത്തിക ബാധ്യതയുണ്ടെന്ന റിക്വെൽമെയുടെ ആരോപണങ്ങളെയും പെരസ് തള്ളിക്കളഞ്ഞു. “ബെർണബ്യൂ നവീകരണത്തിനായുള്ള വായ്പയുടെ പേരിൽ ക്ലബ്ബിന്റെ മൂല്യം പരിശോധിക്കേണ്ടതുണ്ടെന്നത് കള്ളമാണ്. മൂന്ന് ശതമാനത്തിൽ താഴെയാണ് ഈ വായ്പയുടെ പലിശ നിരക്ക്. ഇനിയും ഒരു ബില്യൺ യൂറോ തിരിച്ചടയ്ക്കാനുണ്ട്. സ്റ്റേഡിയത്തിൽ നിന്ന് ലഭിക്കുന്ന വരുമാനം വഴി തന്നെ വായ്പ തിരിച്ചടയ്ക്കാനുള്ള സൗകര്യമുണ്ട്,” അദ്ദേഹം വ്യക്തമാക്കി.

എതിരാളിയുടെ അടിസ്ഥാന സൗകര്യ വികസന നിർദ്ദേശങ്ങളെയും പെരസ് പരിഹസിച്ചു. “പാസേോ ഡി ലാ കാസ്റ്റെല്ലാനയിൽ ഒരു ബില്യൺ യൂറോ മൂല്യമുള്ള സ്ഥലം കൈവശം വെച്ചിട്ട് അവിടെ ഒരു ഊഞ്ഞാൽ കെട്ടാൻ ആഗ്രഹിക്കുന്നതുപോലെയുള്ള വിഢിത്തമാണിത്,” അദ്ദേഹം പറഞ്ഞു. “എന്റെ നേതൃത്വത്തിൽ മാത്രമേ റയൽ മാഡ്രിഡ് എന്നും അംഗങ്ങളുടേതായി നിലനിൽക്കുകയുള്ളൂ.”