ഈ വാരാന്ത്യത്തിൽ നടക്കുന്ന റയൽ മാഡ്രിഡ് പ്രസിഡന്റ് തിരഞ്ഞെടുപ്പിൽ വീണ്ടും മത്സരിക്കുന്ന ഫ്ലോറന്റീനോ പെരസ്, താരം നിക്കോ പാസിനെക്കുറിച്ച് പ്രതികരിച്ചു. കോമോയിൽ മികച്ച പ്രകടനം കാഴ്ചവെച്ചതിനെ തുടർന്ന് നിക്കോ പാസ് സാന്റിയാഗോ ബെർണാബ്യൂവിലേക്ക് മടങ്ങിയെത്തുമെന്ന റിപ്പോർട്ടുകൾക്കിടെയാണ് പെരസിന്റെ പരാമർശം.

ഈ വേനൽക്കാലത്ത് അർജന്റീന താരത്തെ തിരികെ എത്തിക്കുന്നതിനായി 10 ദശലക്ഷം യൂറോയുടെ ബൈ-ബാക്ക് ക്ലോസ് ഉപയോഗിക്കാൻ ലോസ് ബ്ലാങ്കോസ് തയ്യാറെടുക്കുന്നതായാണ് സൂചനകൾ.

“ഞങ്ങളുടെ യൂത്ത് അക്കാദമിയിൽ നിന്ന് വളർന്നുവന്ന മികച്ച കളിക്കാരിൽ ഒരാളാണ് നിക്കോ പാസ്. ഇപ്പോൾ പ്രമുഖ യൂറോപ്യൻ ക്ലബ്ബുകൾ അദ്ദേഹത്തെ സ്വന്തമാക്കാൻ ശ്രമിക്കുന്നുണ്ട്,” പെരസ് പറഞ്ഞു.

“ഇറ്റലിയിലെ കോമോയ്ക്കൊപ്പം അദ്ദേഹം മികച്ചൊരു സീസണാണ് പൂർത്തിയാക്കിയത്. പരിശീലകനുമായും കോച്ചിംഗ് സ്റ്റാഫുമായും ആലോചിച്ച ശേഷം ഞങ്ങൾ ഇക്കാര്യത്തിൽ അന്തിമ തീരുമാനമെടുക്കും.”