ഈ മത്സരത്തിൽ ആഴ്സണൽ കാഴ്ചവെച്ച പല കാര്യങ്ങളും തന്ത്രപരമായ തലത്തിൽ അത്ര മികച്ചതായിരുന്നില്ലെന്ന് നെവിൽ പറഞ്ഞു. ടീം പ്രതിരോധത്തിൽ മികച്ച പ്രകടനം പുറത്തെടുക്കുകയും കഠിനാധ്വാനം ചെയ്യുകയും ചെയ്യുന്നുണ്ട്. വളരെ മികച്ച രീതിയിലാണ് അവർ സംഘടിച്ചിരിക്കുന്നത്, അത് തീർച്ചയായും ബഹുമാനമർഹിക്കുന്നു. അഭിമാനിക്കാവുന്ന കാര്യമാണതെന്നും കിരീടം നേടാൻ സഹായിക്കുന്ന ഘടകമാണെന്നും അദ്ദേഹം അഭിപ്രായപ്പെട്ടു.

എന്നാൽ മുന്നേറ്റനിരയിൽ കൂടുതൽ സ്വാതന്ത്ര്യവും ഒഴുക്കും ആത്മവിശ്വാസവും കാണാനാണ് താൻ ആഗ്രഹിക്കുന്നതെന്നും, ഇന്നത്തെ മത്സരത്തിൽ അതൊന്നും ഉണ്ടായിരുന്നില്ലെന്നും നെവിൽ കൂട്ടിച്ചേർത്തു.

ഒരു സെറ്റ്-പീസിൽ നിന്നാണ് ഗോൾ പിറന്നത്. എന്നാൽ ഓപ്പൺ പ്ലേയിൽ നിന്ന് ഗോളവസരങ്ങൾ സൃഷ്ടിക്കാൻ അവർക്ക് കഴിഞ്ഞില്ല. ഫൈനൽ തേർഡിലേക്ക് പന്ത് എത്തിച്ച ശേഷം വെറുതെ പാസ് ചെയ്ത് കളിക്കുകയാണ് അവർ ചെയ്യുന്നതെന്ന് നിരീക്ഷകൻ പറഞ്ഞു.

കഴിഞ്ഞ കുറെ വർഷങ്ങളായി താൻ ഇതേ കാര്യത്തിൽ വിമർശനം ഉന്നയിക്കുന്നുണ്ടെന്നും അദ്ദേഹം വ്യക്തമാക്കി. 2-0 അല്ലെങ്കിൽ 3-0 ലീഡുള്ളപ്പോൾ എതിരാളികളെ സമ്മർദ്ദത്തിലാക്കാൻ പന്ത് തട്ടുന്നത് മനസ്സിലാക്കാം. എന്നാൽ ആഴ്സണൽ ചെയ്യുന്നത് വളരെ മന്ദഗതിയിലുള്ള നീക്കങ്ങളാണ്. പന്തുമായി ഒരു വശത്ത് നിന്ന് മറ്റൊരു വശത്തേക്ക് സാവധാനം നീങ്ങുമ്പോൾ ന്യൂകാസിൽ താരങ്ങൾക്ക് അങ്ങോട്ട് നീങ്ങേണ്ടി പോലും വരുന്നില്ല. അവർ വെറുതെ മുൻപിൽ തന്നെ നിൽക്കുകയാണെന്നും നെവിൽ പറഞ്ഞു.

ചിലപ്പോൾ താൻ ആഴ്സണലിന്റെ കളിയിൽ ഒരു വ്യക്തമായ ആശയമോ പോസിറ്റീവായ നീക്കങ്ങളോ കാണുന്നില്ലെന്ന് തന്റെ പോഡ്കാസ്റ്റിലൂടെ മുൻ മാഞ്ചസ്റ്റർ യുണൈറ്റഡ് താരം വ്യക്തമാക്കി.