മാഞ്ചസ്റ്റർ സിറ്റിയുടെ ചരിത്രത്തിലെ ഏറ്റവും മികച്ച പരിശീലകനായ പെപ് ഗ്വാർഡിയോള ഈ സീസൺ അവസാനത്തോടെ ക്ലബ്ബ് വിടും. പത്ത് വർഷത്തെ സേവനത്തിന് ശേഷമാണ് താൻ സ്ഥാനമൊഴിയുന്നതെന്ന് ഗ്വാർഡിയോള ഔദ്യോഗികമായി സ്ഥിരീകരിച്ചു. ക്ലബ്ബിനെ വമ്പൻ ശക്തിയാക്കി മാറ്റിയ അദ്ദേഹം 20 പ്രധാന കിരീടങ്ങൾ സ്വന്തമാക്കിയാണ് പടിയിറങ്ങുന്നത്.

താൻ സ്ഥാനമൊഴിയാനുള്ള കാരണങ്ങളെക്കുറിച്ച് ചോദിക്കരുത് എന്ന് ഗ്വാർഡിയോള പറഞ്ഞു. ഇതിന് പ്രത്യേക കാരണങ്ങളൊന്നുമില്ലെന്നും, എന്നാൽ ഇത് വിടവാങ്ങാനുള്ള സമയമാണെന്ന് മനസ്സ് പറയുന്നുണ്ടെന്നും അദ്ദേഹം വ്യക്തമാക്കി. മാഞ്ചസ്റ്റർ സിറ്റിയോടുള്ള സ്നേഹവും ഇവിടുത്തെ ജനങ്ങളും ഓർമ്മകളും എന്നെന്നും ഒപ്പമുണ്ടാകുമെന്നും ഗ്വാർഡിയോള കൂട്ടിച്ചേർത്തു. സിറ്റി ഫുട്ബോൾ ഗ്രൂപ്പിന്റെ ഗ്ലോബൽ അംബാസഡറായി അദ്ദേഹം തുടരും.

ഗ്വാർഡിയോളയുടെ സവിശേഷമായ ശൈലി മാഞ്ചസ്റ്റർ സിറ്റിയെയും ഫുട്ബോളിനെയും ഒരുപോലെ മെച്ചപ്പെടുത്തിയെന്ന് ചെയർമാൻ ഖൽദൂൺ അൽ മുബാറക്ക് അഭിപ്രായപ്പെട്ടു. ആറ് പ്രീമിയർ ലീഗ് കിരീടങ്ങളും ട്രെബിളും ഉൾപ്പെടെ നിരവധി നേട്ടങ്ങളും റെക്കോർഡുകളും സ്വന്തമാക്കിയാണ് ഈ സ്പാനിഷ് പരിശീലകൻ തന്റെ ദൗത്യം അവസാനിപ്പിക്കുന്നത്.