റയൽ മാഡ്രിഡ് താരം അർദ ഗുലർ തന്റെ കരിയറിൽ മികച്ച നേട്ടങ്ങൾ കൈവരിക്കണമെന്ന് മുൻ റയൽ മാഡ്രിഡ് മിഡ്‌ഫീൽഡർ ഗുട്ടി ആശംസിച്ചു. തന്നെപ്പോലെ ഒരു കരിയർ ഗുലറിന് ഉണ്ടാകരുതെന്നും, റയൽ മാഡ്രിഡിനെപ്പോലെ വലിയൊരു ക്ലബ്ബിൽ കളിക്കുമ്പോൾ സ്വാഭാവികമായും നേരിടേണ്ടി വരുന്ന വിമർശനങ്ങളെ അതിജീവിച്ച് മുന്നേറണമെന്നും അദ്ദേഹം ഉപദേശിച്ചു.

“ഗുലർ എന്നെപ്പോലെ ആയിത്തീരരുത് എന്നാണ് ഞാൻ ആഗ്രഹിക്കുന്നത്,” ഗുട്ടി പറഞ്ഞു.

“അവന് മികച്ച കഴിവുകളുണ്ട്, കൃത്യമായ പാസുകൾ നൽകാനുള്ള മികവുമുണ്ട്. പക്ഷേ, ഇതേ കാര്യങ്ങൾ പണ്ട് എന്നെക്കുറിച്ചും പറഞ്ഞിരുന്നു. എന്നെപ്പോലെ ഒരാളുമായി താരതമ്യം ചെയ്യപ്പെടുന്നത് ഗുലറിന് ഗുണകരമാകില്ല.”

“സാന്റിയാഗോ ബെർണബ്യൂവിൽ ഇത്തരം താരങ്ങൾ ആരാധകർക്കിടയിൽ വളരെ പ്രശസ്തരാണ്. എന്നാൽ ടീമിന്റെ പ്രകടനം മോശമാകുമ്പോൾ ഏറ്റവും കൂടുതൽ വിമർശനങ്ങൾ കേൾക്കേണ്ടി വരുന്നതും ഇവരായിരിക്കും,” അദ്ദേഹം കൂട്ടിച്ചേർത്തു.