റയൽ മാഡ്രിഡ് നിലവിൽ നേരിടുന്ന പ്രതിസന്ധികളിൽ മുൻ മധ്യനിര താരം ഗുട്ടി തന്റെ അഭിപ്രായം വ്യക്തമാക്കി. ടീമിലെ ഐക്യമില്ലായ്മയെയും സാബി അലോൺസെയെ പുറത്താക്കിയ തീരുമാനത്തെയും അദ്ദേഹം ചോദ്യം ചെയ്തു.

“റയൽ മാഡ്രിഡിന്റെ പ്രകടനത്തിൽ സ്ഥിരതയില്ല. ഗലാക്റ്റിക്കോസ് കാലഘട്ടവുമായാണ് ഞാൻ ഇവരെ താരതമ്യം ചെയ്യുന്നത്. മികച്ച താരങ്ങളുണ്ടെങ്കിലും ടീം എന്ന നിലയിൽ ഇവർ ഒത്തൊരുമിക്കുന്നില്ല,” ഗുട്ടി പറഞ്ഞു.

“സാബിയെ പുറത്താക്കിയത് എന്നെ അത്ഭുതപ്പെടുത്തി. അദ്ദേഹം അഞ്ച് മാസത്തേക്കോ ഒരു വർഷത്തേക്കോ ഉള്ള ഒരു പരീക്ഷണമായിരുന്നില്ല. ഭാവിയിലേക്കുള്ള കോച്ചായിരുന്നു അദ്ദേഹം. അദ്ദേഹത്തെ പുറത്താക്കുന്ന സാഹചര്യത്തിലേക്ക് കാര്യങ്ങൾ എത്തിയെങ്കിൽ ഡ്രസ്സിംഗ് റൂമിൽ എന്തോ വിചിത്രമായ കാര്യം സംഭവിച്ചിട്ടുണ്ട്. വളരെ നന്നായി പ്രവർത്തിച്ചു കൊണ്ടിരുന്ന അദ്ദേഹത്തെ പുറത്താക്കിയത് തിടുക്കത്തിലുള്ള തീരുമാനമായിപ്പോയി. അവിടെ ഗൗരവകരമായ എന്തോ സംഭവിച്ചിട്ടുണ്ട്.”

“റയൽ മാഡ്രിഡിന് എന്താണ് കുറവില്ലാത്തത്? അവർക്ക് ചിലപ്പോൾ മികച്ച മത്സരങ്ങൾ പുറത്തെടുക്കാൻ കഴിയുന്നു, ചിലപ്പോൾ വളരെ മോശം പ്രകടനവും. പല കാര്യങ്ങളും ഈ ടീമിന് നഷ്ടപ്പെടുന്നുണ്ട്. അവർ ഒരുപാട് ഗോളുകൾ വഴങ്ങുന്നു, പ്രതിരോധത്തിന്റെ ഭാരം മുഴുവൻ വിനീഷ്യസിലോ എംബാപ്പെയിലോ വീഴുന്നു. ഈ ടീമിൽ പല കാര്യങ്ങളും കുറവാണ്.”