ലോകകപ്പ് ഫുട്ബോൾ ടിക്കറ്റുകൾക്ക് അഭൂതപൂർവ്വമായ ഡിമാൻഡാണ് അനുഭവപ്പെടുന്നതെന്ന് ഫിഫ പ്രസിഡന്റ് ജിയാനി ഇൻഫാന്റിനോ പറഞ്ഞു. ടിക്കറ്റ് വിൽപ്പനയും അപേക്ഷകളും പ്രതീക്ഷിച്ചതിലും വളരെ ഉയർന്ന നിലയിലാണെന്ന് അദ്ദേഹം വ്യക്തമാക്കി.

വാർത്താ സമ്മേളനത്തിൽ സംസാരിക്കവേ, ഇതുവരെ 60 ലക്ഷത്തിലധികം ടിക്കറ്റുകൾ വിറ്റഴിച്ചതായി ഇൻഫാന്റിനോ അറിയിച്ചു. നോക്കൗട്ട് മത്സരങ്ങൾക്കായി യോഗ്യത നേടുന്ന ടീമുകൾക്കും ആരാധകർക്കും വേണ്ടി പ്രത്യേക ടിക്കറ്റുകൾ കരുതിവെച്ചിട്ടുള്ളതിനാൽ ടിക്കറ്റ് വിതരണം തുടരുകയാണെന്നും അദ്ദേഹം കൂട്ടിച്ചേർത്തു.

“ഇതുവരെ 6 ദശലക്ഷത്തിലധികം ടിക്കറ്റുകൾ ഞങ്ങൾ വിറ്റു. ടിക്കറ്റുകൾ ലഭ്യമാക്കുന്നത് തുടരുന്നുണ്ട്. അടുത്ത റൗണ്ടുകളിലേക്ക് യോഗ്യത നേടുന്ന ടീമുകളുടെ ആരാധകർക്കായി ഞങ്ങൾ എപ്പോഴും ടിക്കറ്റുകൾ മാറ്റിവെക്കേണ്ടതുണ്ട്,” ഇൻഫാന്റിനോ പറഞ്ഞു.

“മുൻപില്ലാത്ത വിധത്തിലുള്ള ഡിമാൻഡാണ് ടിക്കറ്റുകൾക്ക് ഉള്ളത്. പത്തിരട്ടിയിലേറെ അപേക്ഷകളാണ് ലഭിച്ചുകൊണ്ടിരിക്കുന്നത്. ടിക്കറ്റുകൾക്കായുള്ള അഭ്യർത്ഥനകൾ ശരിക്കും അത്ഭുതകരമാണ്.”

ടിക്കറ്റ് നിരക്കുകളെക്കുറിച്ചും വരുമാനത്തെക്കുറിച്ചുമുള്ള വിഷയത്തിലും ഇൻഫാന്റിനോ വിശദീകരണം നൽകി. ആരാധകർക്ക് ടിക്കറ്റുകൾ ലഭ്യമാക്കുന്നതും സാമ്പത്തിക നേട്ടവും തമ്മിലുള്ള സന്തുലിതാവസ്ഥ പാലിക്കാൻ ഫിഫ ശ്രമിക്കുന്നുണ്ടെന്ന് അദ്ദേഹം പറഞ്ഞു.

ബ്രോഡ്കാസ്റ്റിംഗ് അവകാശങ്ങൾ നേരിട്ട് വിൽക്കുകയാണെങ്കിൽ കൂടുതൽ വരുമാനം ലഭിക്കുമെങ്കിലും, ഫിഫ ഇക്കാര്യത്തിൽ ഒരു സന്തുലിത സമീപനമാണ് സ്വീകരിക്കുന്നതെന്ന് അദ്ദേഹം വ്യക്തമാക്കി.

കാലിഫോർണിയയിലും ലോസ് ഏഞ്ചൽസിലുമായി നടക്കാനിരിക്കുന്ന മത്സരങ്ങൾക്കായി 8,00,000 ടിക്കറ്റുകൾ വിറ്റഴിച്ചതായും, ടിക്കറ്റ് വാങ്ങിയവരിൽ നിന്ന് വളരെ കുറഞ്ഞ പരാതികൾ മാത്രമാണ് ലഭിച്ചിട്ടുള്ളതെന്നും അദ്ദേഹം കൂട്ടിച്ചേർത്തു.

ഏകദേശം 60 ഡോളർ മുതലാണ് ടിക്കറ്റ് നിരക്കുകൾ ആരംഭിക്കുന്നതെന്ന് ഇൻഫാന്റിനോ ചൂണ്ടിക്കാട്ടി. അമേരിക്കയിലെ മറ്റ് പ്രധാന കായിക ഇനങ്ങളെ അപേക്ഷിച്ച് ഇത് ഏറ്റവും കുറഞ്ഞ നിരക്കാണെന്നും ശരാശരി ടിക്കറ്റ് വില ഏകദേശം 500 ഡോളറാണെന്നും അദ്ദേഹം പറഞ്ഞു.

മറ്റ് അമേരിക്കൻ കായിക മത്സരങ്ങളുമായി താരതമ്യം ചെയ്യുമ്പോൾ, ലോകകപ്പ് ടിക്കറ്റ് നിരക്ക് വിപണിയിലെ നിലവാരത്തിനനുസൃതമാണെന്നും ലോകമെമ്പാടുമുള്ള ടിക്കറ്റ് ആവശ്യകതയെ അത് പ്രതിഫലിപ്പിക്കുന്നുണ്ടെന്നും ഫിഫ പ്രസിഡന്റ് കൂട്ടിച്ചേർത്തു.