യൂറോ 2024-ലെ അനുഭവങ്ങൾ ഇംഗ്ലണ്ടിനെ കൂടുതൽ കരുത്തരാക്കുമെന്ന് ജൂഡ് ബെല്ലിംഗ്ഹാം

കഴിഞ്ഞ യൂറോ 2024 ഫുട്ബോൾ ടൂർണമെന്റിൽ ഫൈനൽ വരെ മുന്നേറാൻ ഇംഗ്ലണ്ടിന് സാധിച്ചിരുന്നു. എന്നാൽ കലാശപ്പോരാട്ടത്തിൽ സ്പെയിനിനോട് പരാജയപ്പെടാനായിരുന്നു ഇംഗ്ലീഷ് ടീമിന്റെ വിധി. വരാനിരിക്കുന്ന ലോകകപ്പ് യോഗ്യതാ പോരാട്ടങ്ങൾക്കായി ടീം തയ്യാറെടുക്കുമ്പോൾ, കഴിഞ്ഞ ടൂർണമെന്റിലെ അനുഭവങ്ങൾ ടീമിനെ കൂടുതൽ മെച്ചപ്പെടുത്തുമെന്ന് റയൽ മാഡ്രിഡ് താരം ജൂഡ് ബെല്ലിംഗ്ഹാം വിശ്വസിക്കുന്നു.

ഇംഗ്ലണ്ടിന്റെ ‘ലയൺസ് ഡെൻ’ പോഡ്‌കാസ്റ്റിൽ സംസാരിക്കവേയാണ് താരം ഇക്കാര്യങ്ങൾ പങ്കുവെച്ചത്. “യൂറോ കപ്പിനിടെ മൈതാനത്തിന് പുറത്ത് ചില കാര്യങ്ങളിൽ ഞങ്ങൾക്ക് പിഴവുകൾ സംഭവിച്ചിട്ടുണ്ട്,” ബെല്ലിംഗ്ഹാം പറഞ്ഞു.

“വിവിധ കാരണങ്ങളാൽ ടീം അംഗങ്ങൾ തമ്മിൽ വേണ്ടത്ര ഒത്തൊരുമയോടെ പ്രവർത്തിക്കാൻ കഴിഞ്ഞില്ലെന്നാണ് എനിക്ക് തോന്നുന്നത്. 2018-ലെ മികച്ച പ്രകടനവും ഖത്തർ ലോകകപ്പിലെ മുന്നേറ്റവും കാരണം ഇത്തവണ കിരീടം നേടാൻ സാധ്യതയുള്ള രണ്ടോ മൂന്നോ ടീമുകളിൽ ഒന്നായി ഞങ്ങളെ കണക്കാക്കിയിരുന്നു. അമിത പ്രതീക്ഷകളും സമ്മർദ്ദവും ഇതിന് കാരണമായി. മത്സരങ്ങൾ ജയിക്കുമ്പോൾ പോലും അർഹിക്കുന്ന സന്തോഷം ടീമിന് അനുഭവിക്കാൻ കഴിഞ്ഞില്ല, കാരണം ഞങ്ങളുടെ കളി അത്ര മികച്ചതായിരുന്നില്ല,” അദ്ദേഹം വ്യക്തമാക്കി.

ഫുട്ബോൾ മത്സരങ്ങളിൽ വിജയങ്ങൾ വേഗത്തിൽ മറവിയിലേക്ക് പോകുന്നുവെന്നും, എന്നാൽ ആ നിമിഷങ്ങളെ കൂടുതൽ കാലം കാത്തുസൂക്ഷിക്കാൻ ടീം ശ്രമിക്കണമെന്നും താരം ചൂണ്ടിക്കാട്ടി.

“കഴിഞ്ഞ ടൂർണമെന്റിലെ അനുഭവങ്ങൾ ഇപ്പോൾ ഞങ്ങൾക്ക് കരുത്താണ്. ലോകകപ്പ് ഫൈനലിൽ വിജയഗോൾ നേടുന്നയാൾ ചിലപ്പോൾ നമ്മൾ പ്രതീക്ഷിക്കുന്ന ആളാകണമെന്നില്ല. അതുകൊണ്ട് എപ്പോഴും ജാഗ്രത പാലിക്കേണ്ടതുണ്ട്. ഓരോ താരവും ടീമിന്റെ അവിഭാജ്യ ഘടകമാണെന്ന് തോന്നുകയും, എല്ലാവരും പരസ്പരം സ്നേഹിക്കുകയും വേണം. ഒപ്പം ഫുട്ബോളിനെ ആസ്വദിക്കാൻ കൂടി പഠിക്കണം,” ബെല്ലിംഗ്ഹാം കൂട്ടിച്ചേർത്തു.