റയൽ മാഡ്രിഡ് താരം വിനീഷ്യസ് ജൂനിയറിനെതിരെ ബർണാബ്യൂ സ്റ്റേഡിയത്തിലെ കാണികളിൽ നിന്നുണ്ടായ വിമർശനങ്ങളെയും കൂവലുകളെയും പ്രതിരോധിച്ച് ബ്രസീലിയൻ ഇതിഹാസം കാക്ക രംഗത്ത്.

ഈ സീസണിൽ ആകെ കളിച്ച 50 മത്സരങ്ങളിൽ നിന്ന് 21 ഗോളുകളും 10 അസിസ്റ്റുകളും വിനീഷ്യസ് സ്വന്തമാക്കിയിട്ടുണ്ടെന്നും, അതുകൊണ്ട് തന്നെ ഇതൊരു മോശം സീസണല്ലെന്നും കാക്ക പറഞ്ഞു.

“വിനീഷ്യസ് വളരെ മികച്ച രീതിയിലാണ് ഈ സീസണിൽ കളിച്ചത്. റയൽ മാഡ്രിഡിൽ കളിക്കുക എന്നത് വലിയൊരു വെല്ലുവിളിയാണ്; അവിടെ നിങ്ങൾ കിരീടങ്ങൾ നേടുന്നില്ലെങ്കിൽ, അതൊരു നിരാശാജനകമായ സീസണായി വിലയിരുത്തപ്പെടും. വിനീഷ്യസ് ധാരാളം ഗോളുകൾ നേടുകയും മികച്ച പ്രകടനം പുറത്തെടുക്കുകയും ചെയ്തു. എന്നാൽ മാഡ്രിഡ് ഒന്നും നേടിയില്ല. അതുകൊണ്ടാണ് എല്ലാവരും ഇതൊരു പരാജയമാണെന്ന് പറയുന്നത്,” കാക്ക വ്യക്തമാക്കി.

മൗറീഞ്ഞോ റയൽ മാഡ്രിഡിന്റെ പരിശീലകനായി തിരിച്ചെത്തുന്നതിനെക്കുറിച്ചുള്ള വാർത്തകളോട് കാക്ക പ്രതികരിച്ചത് ഇങ്ങനെയാണ്:

“മാഡ്രിഡിൽ അദ്ദേഹത്തോടൊപ്പമുള്ള മൂന്ന് വർഷം വളരെ രസകരമായ ഒരു കാലഘട്ടമായിരുന്നു. അതൊരു വെല്ലുവിളി നിറഞ്ഞ സമയമായിരുന്നുവെങ്കിലും മികച്ചതുമായിരുന്നു. ഞാൻ ഒരുപാട് കാര്യങ്ങൾ മെച്ചപ്പെടുത്തി. അദ്ദേഹം എനിക്ക് ധാരാളം നല്ല ഉപദേശങ്ങൾ നൽകിയിരുന്നു.

അദ്ദേഹത്തിന് കീഴിൽ കൂടുതൽ മത്സരങ്ങളിൽ കളിക്കാൻ ഞാൻ പരമാവധി ശ്രമിച്ചിട്ടുണ്ട്. അദ്ദേഹത്തിന് എല്ലാവിധ ആശംസകളും നേരുന്നു.

“മാഡ്രിഡിലെ ഈ രണ്ടാം വരവിൽ അദ്ദേഹത്തോടൊപ്പം വിനീഷ്യസ് ഉൾപ്പെടെയുള്ള ധാരാളം ബ്രസീലിയൻ താരങ്ങളുണ്ട്. മൗറീഞ്ഞോയ്ക്ക് കീഴിൽ അടുത്ത സീസണിൽ റയൽ മാഡ്രിഡ് എങ്ങനെയായിരിക്കും എന്നത് കാണാൻ വളരെ കൗതുകമുണ്ടാകും,” കാക്ക പറഞ്ഞു.