2026-ലെ ലോകകപ്പിൽ മികച്ച പ്രകടനം പുറത്തെടുക്കാൻ ജർമ്മൻ ക്യാപ്റ്റൻ ജോഷ്വ കിമ്മിച്ച് തന്റെ ടീമിനോട് ആവശ്യപ്പെട്ടു. ജർമ്മൻ ഫുട്ബോൾ ആരാധകർക്കിടയിൽ അഭിമാനവും ആവേശവും തിരികെ കൊണ്ടുവരികയാണ് ടീമിന്റെ പ്രധാന ലക്ഷ്യമെന്ന് അദ്ദേഹം പറഞ്ഞു.

ക്യൂറസാവോയ്‌ക്കെതിരായ ജർമ്മനിയുടെ ആദ്യ ഗ്രൂപ്പ് മത്സരത്തിന് മുന്നോടിയായി ബിൽഡിനോട് സംസാരിക്കവെയാണ് കിമ്മിച്ച് ഇക്കാര്യം വ്യക്തമാക്കിയത്. “ഞങ്ങൾക്ക് ജർമ്മനിയെ വീണ്ടും അഭിമാനത്തോടെ തലയുയർത്തി നിർത്തണം. അതാണ് ഞങ്ങളുടെ ഏറ്റവും വലിയ ലക്ഷ്യം. ഞങ്ങൾ ഇവിടെ പ്രതിനിധീകരിക്കുന്നത് ഞങ്ങളുടെ രാജ്യം മുഴുവനുമാണെന്ന് ഞങ്ങൾക്കറിയാം,” കിമ്മിച്ച് പറഞ്ഞു.

“ജർമ്മനിക്ക് വേണ്ടി ഒരു പ്രധാന ടൂർണമെന്റിൽ കളിക്കുന്നത് തികച്ചും വ്യത്യസ്തമായ ഒരു അനുഭവമാണ്. ജർമ്മനിയിൽ ആവേശവും സന്തോഷവും നിറയ്ക്കാനുള്ള വലിയൊരു അവസരമാണ് ഞങ്ങൾക്ക് മുന്നിലുള്ളത്,” അദ്ദേഹം കൂട്ടിച്ചേർത്തു.

തന്റെ ക്യാപ്റ്റൻ പദവിയെക്കുറിച്ച് കിമ്മിച്ച് പറയുന്നത് ഇങ്ങനെ: “ഒരു ക്യാപ്റ്റൻ എന്ന നിലയിൽ എന്റെ ഉത്തരവാദിത്തം കുറച്ചുകൂടി സവിശേഷമായി മാറിയിരിക്കുന്നു.”

“ഞങ്ങളുടെ ടീമിൽ വലിയൊരു പോസിറ്റീവ് എനർജി ഞാൻ കാണുന്നുണ്ട്. ഞങ്ങൾ മികച്ച രീതിയിൽ കളിക്കുകയും ഹൃദയം നൽകി പോരാടുകയും ദൃഢനിശ്ചയത്തോടെ മുന്നേറുകയും ചെയ്താൽ ആ ഊർജ്ജം രാജ്യത്തിന് മുഴുവൻ പകരാൻ ഞങ്ങൾക്ക് സാധിക്കും.”

ജൂലിയൻ നാഗൽസ്‌മാന്റെ കീഴിൽ ജർമ്മൻ ക്യാപ്റ്റനായി ഇറങ്ങുന്ന കിമ്മിച്ച് തന്റെ മൂന്നാം ലോകകപ്പിലാണ് പന്ത് തട്ടുന്നത്. 2018, 2022 ലോകകപ്പുകളിലും അദ്ദേഹം ടീമിന്റെ ഭാഗമായിരുന്നു.

ബയേൺ മ്യൂണിക്ക് മിഡ്ഫീൽഡറായ കിമ്മിച്ച് മികച്ച ഫോമിലാണ് ടൂർണമെന്റിനെത്തുന്നത്. കഴിഞ്ഞ സീസണിൽ എല്ലാ മത്സരങ്ങളിലുമായി 49 തവണ ജേഴ്സിയണിഞ്ഞ താരം 2 ഗോളുകളും 10 അസിസ്റ്റുകളും സ്വന്തമാക്കിയിരുന്നു.