ഈ സീസൺ അവസാനത്തോടെ അൽവാരോ അർബെലോയെ പുറത്താക്കുകയാണെങ്കിൽ, റയൽ മാഡ്രിഡിന്റെ പുതിയ സ്ഥിരം പരിശീലക സ്ഥാനത്തേക്ക് ജർഗൻ ക്ലോപ്പിനെയും മൗറീഷ്യോ പോച്ചെറ്റിനോയെയും ക്ലബ് പരിഗണിക്കുന്നതായി സ്പോർട്സ് മെയിൽ റിപ്പോർട്ട് ചെയ്യുന്നു.

ചാമ്പ്യൻസ് ലീഗിൽ നിന്ന് ബയേൺ മ്യൂണിക്ക് റയൽ മാഡ്രിഡിനെ പുറത്താക്കിയിരുന്നു. കൂടാതെ ലാ ലിഗയിൽ ബാഴ്‌സലോണയേക്കാൾ ഒമ്പത് പോയിന്റ് പിന്നിലായ റയൽ മാഡ്രിഡ് നിലവിൽ കടുത്ത പ്രതിസന്ധിയിലൂടെയാണ് കടന്നുപോകുന്നത്.

റയൽ മാഡ്രിഡ് പ്രസിഡന്റ് ഫ്ലോറന്റീനോ പെരസിന് ഈ രണ്ട് പരിശീലകരെയും വലിയ മതിപ്പാണെന്ന് ഡെയ്ലി മെയിൽ സ്‌പോർട്ട് വ്യക്തമാക്കുന്നു. ജർഗൻ ക്ലോപ്പ് നിലവിൽ റെഡ് ബുൾ ഗ്രൂപ്പിന്റെ സീനിയർ റോളിലാണ് പ്രവർത്തിക്കുന്നത്. മൗറീഷ്യോ പോച്ചെറ്റിനോ ഈ വേനൽക്കാലത്ത് 2026 ലോകകപ്പിൽ യുഎസ്‌എ ടീമിനെ നയിക്കാനുള്ള തയ്യാറെടുപ്പിലാണ്.

ക്ലോപ്പിന്റെ മുൻകാല നേട്ടങ്ങളും നേതൃപാടവവും അദ്ദേഹത്തെ റയലിന് അനുയോജ്യമായ സ്ഥാനാർത്ഥിയാക്കുന്നു. എന്നാൽ ലിവർപൂൾ വിട്ടതിന് ശേഷം ഉടൻ തന്നെ അദ്ദേഹം പരിശീലക വേഷത്തിലേക്ക് തിരിച്ചെത്തുമോ എന്നതിൽ ആശങ്കയുണ്ട്.

നേരത്തെയും റയൽ മാഡ്രിഡുമായി ബന്ധപ്പെട്ട് പോച്ചെറ്റിനോയുടെ പേര് ഉയർന്നു കേട്ടിട്ടുണ്ട്. പിഎസ്ജിയിൽ ഒന്നിച്ചുള്ള കാലത്ത് കിലിയൻ എംബാപ്പെയുമായി മികച്ച ബന്ധമാണ് പോച്ചെറ്റിനോയ്ക്കുള്ളത്.

യുവ ഇംഗ്ലീഷ് താരങ്ങളെ വളർത്തിക്കൊണ്ടുവരുന്നതിൽ ഈ അർജന്റീനക്കാരനായ പരിശീലകനുള്ള പരിചയം ജൂഡ് ബെല്ലിംഗ്ഹാമിനെയും ട്രെന്റ് അലക്സാണ്ടർ-അർനോൾഡിനെയും പോലുള്ള താരങ്ങൾക്ക് ബെർണബ്യൂവിൽ ഗുണം ചെയ്യുമെന്നും വിലയിരുത്തപ്പെടുന്നു.