മാഞ്ചസ്റ്റർ യുണൈറ്റഡ് മിഡ്‌ഫീൽഡർ കോബി മൈനു തന്റെ മത്സരദിനത്തിലെ ശീലങ്ങളെക്കുറിച്ചും ഭക്ഷണരീതികളെക്കുറിച്ചും ക്ലബ്ബ് മാഗസിന് നൽകിയ അഭിമുഖത്തിൽ വെളിപ്പെടുത്തി.

“എന്ത് കഴിക്കണമെന്ന് ഞാൻ മുൻകൂട്ടി തീരുമാനിക്കാറില്ല, അപ്പോൾ തോന്നുന്നത് കഴിക്കുകയാണ് പതിവ്. കൂടുതൽ ഊർജ്ജം ആവശ്യമാണെന്ന് തോന്നിയാലോ അല്ലെങ്കിൽ കളി കടുപ്പമായിരിക്കുമെന്ന് കരുതിയാലോ കാർബോഹൈഡ്രേറ്റ് കൂടുതൽ അടങ്ങിയ ഭക്ഷണം കഴിക്കാറുണ്ട്. പാസ്ത പോലുള്ളവയാണ് അത്തരം സമയങ്ങളിൽ തിരഞ്ഞെടുക്കാറുള്ളത്.”

“മത്സരത്തിന് മുൻപായി ഞാൻ എപ്പോഴും ഒരു ബീറ്റ്‌റൂട്ട് ഷോട്ട് കുടിക്കാറുണ്ട്. അത് എനിക്ക് നല്ലതാണ്, അതെന്നെ കൂടുതൽ ഉന്മേഷവാനാക്കുന്നു. കൂടാതെ കാർബോഹൈഡ്രേറ്റ് അടങ്ങിയ ചില പാനീയങ്ങളും കഴിക്കാറുണ്ട്.”

“എനിക്ക് അന്ധവിശ്വാസങ്ങളൊന്നുമില്ല. അത്തരം കാര്യങ്ങളിൽ നിന്ന് വിട്ടുനിൽക്കാനാണ് ഞാൻ ശ്രമിക്കാറുള്ളത്. ഒരു കാര്യം പലതവണ ആവർത്തിച്ച് ചെയ്താൽ പിന്നീട് അത് ശീലമായി മാറും. അതുകൊണ്ട് അത്തരം ശീലങ്ങൾ ഒഴിവാക്കാൻ ഞാൻ ശ്രമിക്കാറുണ്ട്.”

“അതേസമയം, ഇതൊരു ഫുട്ബോൾ മത്സരമാണെന്നും ആസ്വദിച്ച് കളിക്കുകയാണ് വേണ്ടതെന്നും ഞാൻ വിശ്വസിക്കുന്നു. മത്സരത്തിന് മുൻപ് കാസെമിറോ എപ്പോഴും എന്നോട് പറയാറുണ്ട്, ‘നമുക്ക് ആസ്വദിച്ച് കളിക്കാം ബ്രോ’ എന്ന്.”