ഫാന്റസി ഫുട്ബോൾ പ്ലാറ്റ്‌ഫോമായ സോറേറിന് (Sorare) നൽകിയ അഭിമുഖത്തിലാണ് റയൽ മാഡ്രിഡിലെ തന്റെ അനുഭവങ്ങളെക്കുറിച്ച് കിലിയൻ എംബാപ്പെ മനസ്സ് തുറന്നത്. ക്ലബ്ബിന്റെ ചരിത്രത്തിൽ തന്റേതായ ഒരിടം കണ്ടെത്താനാണ് ആഗ്രഹിക്കുന്നതെന്ന് ഫ്രഞ്ച് ക്യാപ്റ്റൻ പറഞ്ഞു.

“ബാഴ്‌സലോണ ആരാധകർ ഒഴികെ ഭൂരിഭാഗം ആളുകളും ലോകത്തിലെ ഏറ്റവും വലിയ ക്ലബ്ബായി കാണുന്നത് റയൽ മാഡ്രിഡിനെയാണ്. മഹത്വത്തെ പ്രതിനിധീകരിക്കുന്ന ക്ലബ്ബാണിത്. ഫുട്ബോൾ ചരിത്രത്തിൽ ബാഴ്‌സലോണയും സ്വാധീനം ചെലുത്തിയിട്ടുണ്ട്, എങ്കിലും ലോകമെമ്പാടും ഏറ്റവും കൂടുതൽ ജനപ്രീതിയുള്ള ക്ലബ്ബ് റയൽ മാഡ്രിഡ് തന്നെയാണ്,” എംബാപ്പെ വ്യക്തമാക്കി.

തന്റെ ലക്ഷ്യങ്ങളെക്കുറിച്ച് വ്യക്തമായ കാഴ്ചപ്പാടാണ് താരത്തിനുള്ളത്. “റയൽ മാഡ്രിഡിനൊപ്പം ചരിത്രം രചിക്കാനാണ് ഞാൻ ആഗ്രഹിക്കുന്നത്. കാരണം, ലോകത്തിലെ ഏറ്റവും വലിയ ക്ലബ്ബിൽ നിങ്ങൾ ചരിത്രം കുറിക്കുകയാണെങ്കിൽ, ഫുട്ബോൾ ലോകത്ത് നിങ്ങൾക്ക് സുപ്രധാനമായ ഒരു സ്ഥാനമുണ്ടാകും,” അദ്ദേഹം കൂട്ടിച്ചേർത്തു.

മാഡ്രിഡ് കുപ്പായത്തിലെ തന്റെ ഏറ്റവും മികച്ച നിമിഷമായി മാഞ്ചസ്റ്റർ സിറ്റിക്കെതിരായ ഹാട്രിക്കിനെയാണ് എംബാപ്പെ ചൂണ്ടിക്കാണിക്കുന്നത്. ചാമ്പ്യൻസ് ലീഗിലെ നോക്കൗട്ട് മത്സരത്തിൽ ബെർണബ്യൂവിൽ വെച്ച് താൻ നേടിയ ആ ഹാട്രിക്ക് തന്റെ കരിയറിലെ ഏറ്റവും മികച്ച പ്രകടനങ്ങളിൽ ഒന്നാണെന്ന് അദ്ദേഹം അനുസ്മരിച്ചു.