സ്പെയിനിൽ ഹോളിവുഡ് താരത്തിളക്കം; ‘സ്പൈഡർമാൻ’ പ്രചാരണവുമായി ടോം ഹോളണ്ട് മാഡ്രിഡിൽ

സ്പെയിനിലെ മാഡ്രിഡിൽ വെച്ച് ഹോളിവുഡ് താരവും സ്പൈഡർമാൻ സിനിമയിലെ നായകനുമായ ടോം ഹോളണ്ട് തന്റെ പുതിയ ചിത്രമായ ‘സ്പൈഡർ-മാൻ: ബ്രാൻഡ് ന്യൂ ഡേ’യുടെ പ്രചാരണ പരിപാടികൾക്ക് തുടക്കം കുറിച്ചു. മാഡ്രിഡിലെ പ്ലാസ ഡി കോളണിൽ നടന്ന സ്പെയിൻ ദേശീയ ഫുട്ബോൾ ടീമിന്റെ ലോകകപ്പ് കിക്ക്-ഓഫ് ആഘോഷവേദിയിലാണ് 30-കാരനായ ഹോളണ്ട് പങ്കെടുത്തത്. സിനിമയും സ്പോർട്സും കൂടിച്ചേർന്ന ചടങ്ങിൽ, സ്പൈഡർമാൻ ബ്രാൻഡിംഗുള്ള സ്പെയിൻ ദേശീയ ടീമിന്റെ ജേഴ്സി താരം വെറ്ററൻ സ്ട്രൈക്കർ ജോസെലു മാറ്റോയ്ക്ക് സമ്മാനിച്ചു.

ഈ കൂടിക്കാഴ്ചയിലുള്ള സന്തോഷം ജോസെലു തന്റെ ഇൻസ്റ്റാഗ്രാമിലൂടെ പങ്കുവെച്ചു. ടോം ഹോളണ്ടിനൊപ്പമുള്ള ചിത്രം പങ്കുവെച്ചുകൊണ്ട് “ഇന്ന് ഉച്ചകഴിഞ്ഞ് പ്ലാസ ഡി കോളണിൽ വെച്ച് നമ്മുടെ @sefutbol ടീമിനെ പിന്തുണയ്ക്കാൻ എനിക്ക് സാധിച്ചു,” എന്നാണ് ജോസെലു കുറിച്ചത്.

നേരത്തെ, മാഡ്രിഡിൽ നടന്ന ചിത്രത്തിന്റെ ഔദ്യോഗിക ഫോട്ടോ കോളിൽ ടോം ഹോളണ്ടിനൊപ്പം സഹതാരം സെൻഡായയും പങ്കെടുത്തു. ലോകമെമ്പാടുമുള്ള വലിയൊരു പ്രചാരണ പരിപാടിയുടെ തുടക്കമാണ് മാഡ്രിഡ്. ജൂലൈയിൽ ചിത്രം റിലീസ് ചെയ്യുന്നതിന് മുന്നോടിയായി ഷാങ്ഹായ്, ലണ്ടൻ, ലോസ് ഏഞ്ചൽസ്, ആംസ്റ്റർഡാം, മെക്സിക്കോ സിറ്റി, പാരീസ്, ബെർലിൻ, റോം, ന്യൂയോർക്ക് എന്നീ നഗരങ്ങളിൽ ഇവർ സന്ദർശനം നടത്തും. ഇതിനുപുറമെ, ഇരുവരും ഒന്നിച്ചഭിനയിക്കുന്ന ‘ദി ഒഡീസി’ എന്ന ചിത്രത്തിന്റെ പ്രചാരണ തിരക്കുകളിലും ഇവർ സജീവമാണ്.

“അവൻ അതിവേഗക്കാരനാണ്”: ഫുട്ബോൾ താരങ്ങളിൽ സ്പൈഡർമാനെ കണ്ടെത്തി ഹോളണ്ട്

ഫുട്ബോൾ ആരാധകനായ ടോം ഹോളണ്ട്, മാഡ്രിഡിലെ പ്രസ് മീറ്റിനിടെ സ്പൈഡർമാന്റെ കഴിവുകളുള്ള ഫുട്ബോൾ താരങ്ങളെക്കുറിച്ച് സംസാരിച്ചു. സ്പൈഡർമാനായി അഭിനയിക്കാൻ യോജിച്ച താരം ആരാണെന്ന ചോദ്യത്തിന് സ്പെയിനിന്റെ യുവതാരം ലമിൻ യമാലിന്റെ പേരാണ് ഹോളണ്ട് നിർദ്ദേശിച്ചത്. “നല്ല ചോദ്യം! ഒരുപക്ഷേ ലമിൻ യമാൽ ആയിരിക്കും. പന്തുമായുള്ള അവന്റെ വേഗതയും ചടുലതയും അത്ഭുതകരമാണ്. അവൻ ഇതിന് അനുയോജ്യനാണെന്ന് ഞാൻ കരുതുന്നു,” ഹോളണ്ട് പറഞ്ഞു.

തുടർന്ന് അർജന്റീനയുടെയും അത്‌ലറ്റിക്കോ മാഡ്രിഡിന്റെയും മുന്നേറ്റനിര താരമായ ജൂലിയൻ അൽവാരസിനെക്കുറിച്ചും ഹോളണ്ട് സംസാരിച്ചു. തന്റെ ഗോളാഘോഷങ്ങളിലൂടെ ‘ലാ അരാന’ (സ്പൈഡർ) എന്ന് വിളിപ്പേരുള്ള അൽവാരസിനെ കണ്ടപ്പോൾ ഹോളണ്ട് ആവേശഭരിതനായി. “തീർച്ചയായും, അദ്ദേഹം ഒരു മികച്ച സ്പൈഡർമാൻ തന്നെയാകും,” എന്ന് ചിരിച്ചുകൊണ്ട് ഹോളണ്ട് മറുപടി നൽകി. അദ്ദേഹത്തിന് ലോകകപ്പിൽ എല്ലാവിധ ആശംസകളും നേരുന്നതായും ഹോളണ്ട് കൂട്ടിച്ചേർത്തു. കൂടാതെ തന്റെ പേഴ്സണൽ ഫാന്റസി ഫുട്ബോൾ ടീമിൽ അൽവാരസ് ഉൾപ്പെട്ടിട്ടുണ്ടെന്നും അദ്ദേഹം വെളിപ്പെടുത്തി.

ഹോളണ്ടിന്റെ പരാമർശത്തിന് പിന്നാലെ, ഈ അഭിമുഖത്തിന്റെ വീഡിയോ സ്ക്രീൻഷോട്ട് സഹിതം അൽവാരസ് തന്റെ സോഷ്യൽ മീഡിയയിൽ പങ്കുവെക്കുകയും താരത്തിന് നന്ദി അറിയിക്കുകയും ചെയ്തു.