മാഞ്ചസ്റ്റർ യുണൈറ്റഡ് ഈ വേനൽക്കാലത്തെ തങ്ങളുടെ ആദ്യ സൈനിങ് പൂർത്തിയാക്കാനൊരുങ്ങുന്നു. അറ്റലാന്റയുടെ മിഡ്‌ഫീൽഡർ എഡേഴ്‌സൺ ഉടൻ തന്നെ ഓൾഡ് ട്രഫോർഡിലെത്തും.

26-കാരനായ ഈ ബ്രസീലിയൻ താരത്തെ കഴിഞ്ഞ 12 മാസമായി മാഞ്ചസ്റ്റർ യുണൈറ്റഡ് നിരീക്ഷിച്ചു വരികയാണ്. ഏകദേശം 42 മില്യൺ പൗണ്ടാണ് ഈ ട്രാൻസ്ഫറിനായി ചെലവാകുന്നത്. 2024-ലെ അറ്റലാന്റയുടെ യൂറോപ്പ ലീഗ് വിജയത്തിൽ നിർണായക പങ്കുവഹിച്ച എഡേഴ്‌സൺ, ആ സീസണിൽ കളിച്ച 52 മത്സരങ്ങളിൽ നിന്ന് ഏഴ് ഗോളുകൾ നേടി മികച്ച പ്രകടനമാണ് കാഴ്ചവെച്ചത്.

സ്ഥിരം മാനേജറായി ചുമതലയേറ്റ മൈക്കൽ കാറിക്ക്, ഈ മധ്യനിര താരത്തിന്റെ കഴിവുകളിൽ വലിയ വിശ്വാസമാണ് പുലർത്തുന്നത്. ഡിഫൻസീവ് മിഡ്‌ഫീൽഡർ ആയും മുന്നേറ്റനിരയിൽ സഹായിയായും കളിക്കാൻ എഡേഴ്‌സണ് സാധിക്കും. നിലവിൽ ഇറ്റലിയിൽ 25,000 പൗണ്ട് പ്രതിവാര വേതനം വാങ്ങുന്ന താരം, മാഞ്ചസ്റ്റർ യുണൈറ്റഡിലേക്ക് എത്തുമ്പോൾ അത് 75,000 പൗണ്ടായി ഉയരും. ക്ലബ്ബിന്റെ സാമ്പത്തിക പ്ലാനുകൾക്ക് അനുസൃതമാണ് ഈ തുക.

പ്രീമിയർ ലീഗിൽ കളിക്കാനുള്ള തന്റെ ആഗ്രഹം താരം നേരത്തെ തന്നെ വ്യക്തമാക്കിയിട്ടുണ്ട്. “പന്ത് കൈവശം വെച്ച് കളിക്കുകയാണ് എന്റെ പ്രത്യേകത. പ്രതിരോധത്തിലും ആക്രമണത്തിലും എനിക്ക് ഒരുപോലെ തിളങ്ങാൻ സാധിക്കും. ഒഴിഞ്ഞു കിടക്കുന്ന ഇടങ്ങളിലേക്ക് പന്തുമായി മുന്നേറാൻ എനിക്ക് എളുപ്പമാണ്,” എന്ന് താരം മുൻപ് അഭിപ്രായപ്പെട്ടിരുന്നു.

അറ്റലാന്റയിൽ നിന്ന് നേരത്തെ യുണൈറ്റഡിൽ എത്തിയ റാസ്മസ് ഹോജ്‌ലണ്ട് നേരിട്ടതുപോലെയുള്ള പൊരുത്തപ്പെടൽ പ്രയാസങ്ങൾ എഡേഴ്‌സൺ നേരിടേണ്ടി വരില്ലെന്നാണ് മാഞ്ചസ്റ്റർ യുണൈറ്റഡ് പ്രതീക്ഷിക്കുന്നത്.