ഗലാറ്റസറെയുടെ ഓഫർ നിരസിച്ച് കെഫ്രൻ തുറാം; യുവന്റസ് പ്രതിസന്ധിയിൽ

യുവന്റസ് മിഡ്‌ഫീൽഡർ കെഫ്രൻ തുറാം തുർക്കിഷ് ക്ലബ്ബായ ഗലാറ്റസറെയുടെ ട്രാൻസ്ഫർ ഓഫർ നിരസിച്ചതായി ‘ടുട്ടോസ്പോർട്ട്’ റിപ്പോർട്ട് ചെയ്യുന്നു. യുവന്റസിൽ തന്നെ തുടരാനാണ് ഈ ഫ്രഞ്ച് താരത്തിന്റെ താല്പര്യം. എന്നാൽ ക്ലബ്ബ് വിടാൻ നിർബന്ധിതനായാൽ ഇംഗ്ലീഷ് പ്രീമിയർ ലീഗിലെ ക്ലബ്ബുകൾക്ക് മുൻഗണന നൽകുമെന്നും താരം വ്യക്തമാക്കിയിട്ടുണ്ട്.

സാമ്പത്തിക പ്രതിസന്ധി നേരിടുന്ന യുവന്റസിന് ഈ മാസം അവസാനത്തിന് മുൻപ് 20 ദശലക്ഷം യൂറോയുടെ അധിക വരുമാനം കണ്ടെത്തേണ്ടതുണ്ട്. ഇതിനാൽ തന്നെ കെഫ്രൻ തുറാം അടക്കമുള്ള പ്രധാന താരങ്ങളെ വിൽക്കാൻ ക്ലബ്ബ് നിർബന്ധിതമായിരിക്കുകയാണ്.

സീരി എയിലെ മികച്ച പ്രകടനത്തെ തുടർന്ന് ലിവർപൂൾ, ന്യൂകാസിൽ, ആസ്റ്റൺ വില്ല, നോട്ടിംഗ്ഹാം ഫോറസ്റ്റ് എന്നീ പ്രീമിയർ ലീഗ് ക്ലബ്ബുകൾ നേരത്തെ തന്നെ തുറാമിനെ നിരീക്ഷിച്ചിരുന്നു. നിലവിൽ താരത്തിന് 40 ദശലക്ഷം യൂറോയാണ് യുവന്റസ് വില നിശ്ചയിച്ചിരിക്കുന്നത്. ഒപ്പം ഡിഫൻഡർ ഫെഡറിക്കോ ഗാട്ടിയെയും ട്രാൻസ്ഫർ മാർക്കറ്റിൽ ക്ലബ്ബ് ലഭ്യമാക്കിയിട്ടുണ്ട്.