2026-ലെ ഫിഫ ലോകകപ്പിനായുള്ള 26 അംഗ മെക്സിക്കൻ ടീമിനെ ഹെഡ് കോച്ച് ജാവിയർ അഗ്യുറെ പ്രഖ്യാപിച്ചു. അനുഭവസമ്പന്നനായ ഗോൾകീപ്പർ ഗില്ലെർമോ ഒച്ചോവ തന്റെ കരിയറിലെ ആറാമത്തെ ലോകകപ്പിൽ കളിക്കാൻ ഒരുങ്ങുകയാണ്.

മെക്സിക്കൻ ഫുട്ബോൾ ഫെഡറേഷൻ പുറത്തിറക്കിയ വീഡിയോയിലൂടെയാണ് ലോകകപ്പ് സ്‌ക്വാഡിനെ ഔദ്യോഗികമായി സ്ഥിരീകരിച്ചത്. ജൂൺ 11-ന് ദക്ഷിണാഫ്രിക്കയ്‌ക്കെതിരെയാണ് മെക്സിക്കോയുടെ ആദ്യ മത്സരം. തുടർന്ന് ജൂൺ 18-ന് ദക്ഷിണ കൊറിയയെയും, ജൂൺ 24-ന് ചെക്ക് റിപ്പബ്ലിക്കിനെയും ഗ്രൂപ്പ് ഘട്ടത്തിൽ മെക്സിക്കോ നേരിടും.

2022 ഖത്തർ ലോകകപ്പിൽ കളിച്ച 12 താരങ്ങൾ ഉൾപ്പെടുന്നതാണ് ഈ ടീം. ഇവർക്ക് പുറമെ തിരിച്ചെത്തിയ അന്താരാഷ്ട്ര താരങ്ങളും പരിക്കിൽ നിന്ന് മുക്തരായ കളിക്കാരും സംഘത്തിലുണ്ട്.

ഗോൾകീപ്പർമാർ: റൗൾ റാഞ്ചൽ (ഗ്വാഡലജാര), കാർലോസ് അസെവെഡോ (സാന്റോസ് ലഗുണ), ഗില്ലെർമോ ഒച്ചോവ (എ.ഇ.എൽ ലിമാസോൾ)

പ്രതിരോധനിര: ജീസസ് ഗല്ലാർഡോ (ടോലുക്ക), സീസർ മോണ്ടെസ് (ലോക്കോമോറ്റീവ് മോസ്കോ), ജോഹാൻ വാസ്ക്വസ (ജെനോവ), ജോർജ്ജ് സാഞ്ചസ് (പി.എ.ഒ.കെ), ഇസ്രായേൽ റയസ് (ക്ലബ് അമേരിക്ക), മറ്റിയോ ഷാവേസ് (എ.ഇഡ് അൽക്മാർ)

മധ്യനിര: എറിക് ലിറ (ക്രൂസ് അസുൽ), എഡ്സൺ അൽവാരസ് (വെസ്റ്റ് ഹാം യുണൈറ്റഡ്), ലൂയിസ് റോമോ (ഗ്വാഡലജാര), ഒബെഡ് വർഗാസ് (അറ്റ്ലറ്റിക്കോ മാഡ്രിഡ്), ലൂയിസ് ഷാവേസ് (ഡൈനാമോ മോസ്കോ), ഓർബെലിൻ പിനെഡ (എ.ഇ.കെ ഏഥൻസ്), അൽവാരോ ഫിഡാൽഗോ (റിയൽ ബെറ്റിസ്), ബ്രയാൻ ഗുട്ടറെസ് (ഗ്വാഡലജാര), ഗിൽബെർട്ടോ മോറ (ടിജുവാന)

മുന്നേറ്റനിര: റൗൾ ജിമെനെസ് (ഫുൾഹാം), സാന്റിയാഗോ ഗിമെനെസ് (എ.സി മിലാൻ), ജൂലിയൻ ക്വിനോണസ് (അൽ-ഖദ്സിയ), അലക്സിസ് വേഗ (ടോലുക്ക), സീസർ ഹുവർട്ട (ആൻഡർലെക്റ്റ്), റോബർട്ടോ അൽവരാഡോ (ഗ്വാഡലജാര), ഗില്ലെർമോ മാർട്ടിനെസ് (പുമസ് യു.എൻ.എ.എം), അർമാൻഡോ ഗോൺസാലസ് (ഗ്വാഡലജാര)