ലിവർപൂൾ പരിശീലകൻ ആർനെ സ്ലോട്ടിനെ പരസ്യമായി വിമർശിച്ച മുഹമ്മദ് സലായുടെ നടപടിയെ മുൻ ലിവർപൂൾ ഡിഫൻഡർ ജോൺ ആർനെ റീസെ വിമർശിച്ചു. സീസൺ അവസാനിക്കുന്നതുവരെ സലാ കാത്തിരിക്കണമായിരുന്നുവെന്ന് റീസെ അഭിപ്രായപ്പെട്ടു.

ലിവർപൂൾ വീണ്ടും തങ്ങളുടെ പഴയ ശൈലിയായ ‘ഹെവി മെറ്റൽ ഫുട്ബോളി’ലേക്ക് മടങ്ങണമെന്ന് സലാ അടുത്തിടെ ആവശ്യപ്പെട്ടിരുന്നു. ഇത് ആർനെ സ്ലോട്ടിന് കീഴിലുള്ള ക്ലബ്ബിന്റെ പ്രവർത്തനശൈലിയെക്കുറിച്ച് പുതിയ ചർച്ചകൾക്ക് തുടക്കമിട്ടിരിക്കുകയാണ്.

മാത്രമല്ല, ലിവർപൂളിന്റെ ഈ സീസണിലെ മോശം പ്രകടനത്തിന് പരിശീലകനെ മാത്രം കുറ്റപ്പെടുത്തുന്നതിൽ അർത്ഥമില്ലെന്നും റീസെ പറഞ്ഞു. മുഴുവൻ സ്ക്വാഡിനും ഇതിൽ ഉത്തരവാദിത്തമുണ്ടെന്ന് അദ്ദേഹം വ്യക്തമാക്കി. ആർനെ സ്ലോട്ടിനെ പുറത്താക്കാൻ ലിവർപൂൾ ആലോചിച്ചിരുന്നെങ്കിൽ അവർ ഇതിനകം സാബി അലോൺസയുടെ പ്രതിനിധികളുമായി സംസാരിക്കുമായിരുന്നു എന്ന് റീസെ ചൂണ്ടിക്കാട്ടി. അലോൺസ ചെൽസിയുമായി വേഗത്തിൽ കരാറിൽ എത്തിയത് ലിവർപൂൾ നിലവിൽ പരിശീലകനെ മാറ്റാൻ ഉദ്ദേശിക്കുന്നില്ല എന്നതിന്റെ തെളിവാണെന്നും അദ്ദേഹം കൂട്ടിച്ചേർത്തു.

പരിശീലകരെ വിമർശിക്കുമ്പോൾ പലപ്പോഴും കളിക്കാരുടെ മോശം പ്രകടനം അവഗണിക്കപ്പെടുകയാണെന്നും റീസെ ഓർമ്മിപ്പിച്ചു. പരിശീലകൻ നൽകുന്ന നിർദ്ദേശങ്ങൾ ഉണ്ടായിരുന്നിട്ടും ഈ സീസണിൽ പല താരങ്ങളും നിലവാരത്തിനൊത്ത് കളിച്ചിട്ടില്ലെന്നും റീസെ വ്യക്തമാക്കി.