2004-ൽ ജനിച്ച അർജന്റീനൻ പ്രതിഭ നിക്കോ പാസ് നിലവിൽ കോമോയ്ക്ക് വേണ്ടി മികച്ച പ്രകടനമാണ് കാഴ്ചവെക്കുന്നത്. ഇതോടെ താരം ട്രാൻസ്ഫർ വിപണിയിൽ സജീവ ചർച്ചയാവുകയാണ്. SportMediaset-ന് നൽകിയ അഭിമുഖത്തിൽ സെസ് ഫാബ്രിഗാസിന് കീഴിലുള്ള തന്റെ സീസണിനെക്കുറിച്ച് നിക്കോ പാസ് മനസ്സ് തുറന്നു.

“ഞങ്ങൾ വളരെ മികച്ച സീസണിലൂടെയാണ് കടന്നുപോകുന്നത്. ഇത്രയും മനോഹരമായൊരു മുന്നേറ്റം ഞങ്ങൾ പ്രതീക്ഷിച്ചിരുന്നില്ല. ഞങ്ങളുടെ കഠിനാധ്വാനത്തിന്റെ ഫലമാണിത്. ഇതിൽ ഏറ്റവും പ്രധാനപ്പെട്ട ഘടകം ഫാബ്രിഗാസാണ്. ഞങ്ങളിൽ വലിയ വിശ്വാസമുള്ള യുവ പരിശീലകനാണ് അദ്ദേഹം. ഫുട്ബോളിനായി ജീവിക്കുന്ന, കഠിനാധ്വാനം ചെയ്യുന്ന, കാര്യങ്ങൾ പഠിക്കാൻ സമയം കണ്ടെത്തുന്ന അദ്ദേഹം, എനിക്ക് ഇഷ്ടമുള്ള രീതിയിൽ കളിക്കാൻ സ്വാതന്ത്ര്യം നൽകുന്നു. അതാണ് ഏറ്റവും പ്രധാനം,” നിക്കോ പാസ് പറഞ്ഞു.

“കളിക്കളത്തിലിറങ്ങുമ്പോൾ ഞാൻ എന്റെ കളിയിൽ മാത്രമാണ് ശ്രദ്ധ കേന്ദ്രീകരിക്കുന്നത്. പുറത്തുള്ള കാര്യങ്ങളെക്കുറിച്ച് ഞാൻ ചിന്തിക്കാറില്ല. ഇന്ററുമായുള്ള ചർച്ചകൾ നടക്കുന്നുണ്ടോ എന്ന ചോദ്യത്തിന്, അങ്ങനെയൊന്നുമില്ലെന്നായിരുന്നു മറുപടി. റയൽ മാഡ്രിഡിനെക്കുറിച്ചും ഞാൻ ഇപ്പോൾ ചിന്തിക്കുന്നില്ല. ഞാൻ കോമോയിൽ 100 ശതമാനം ശ്രദ്ധ കേന്ദ്രീകരിക്കുന്നു. ഇവിടെ എന്റെ മികച്ച പ്രകടനം പുറത്തെടുക്കാനാണ് ഞാൻ ആഗ്രഹിക്കുന്നത്. ഭാവിയിൽ എന്തെങ്കിലും സാധ്യതകൾ ഉണ്ടാകുകയാണെങ്കിൽ അപ്പോൾ നോക്കാം,” താരം വ്യക്തമാക്കി.

അർജന്റീനൻ ദേശീയ ടീമിലെ അരങ്ങേറ്റത്തെക്കുറിച്ചും ലോകകപ്പ് സ്വപ്നത്തെക്കുറിച്ചും അദ്ദേഹം സംസാരിച്ചു: “2024 ഒക്ടോബറിൽ ബൊളീവിയക്കെതിരെ സെലക്ഷൻ കുപ്പായത്തിൽ ഇറങ്ങാനായത് ഒരു സ്വപ്നം പോലെയായിരുന്നു. മത്സരം കഴിഞ്ഞ ശേഷമാണ് അത് ശരിക്കും ബോധ്യപ്പെട്ടത്. മെസ്സിക്കായി ഒരു അസിസ്റ്റ് നൽകാൻ കഴിഞ്ഞു എന്നത് വളരെ പ്രത്യേകതയുള്ള കാര്യമാണ്, കാരണം എന്റെ പിതാവും സ്റ്റേഡിയത്തിൽ കളി കാണാനുണ്ടായിരുന്നു. കഠിനാധ്വാനം ചെയ്യാനും എളിമയോടെ തുടരാനും ലിയോ (മെസ്സി) എന്നോട് പറഞ്ഞു. അദ്ദേഹത്തിൽ നിന്ന് എന്തെങ്കിലും ഒന്ന് മോഷ്ടിക്കാൻ കഴിയുമെങ്കിൽ അത് അദ്ദേഹത്തിന്റെ ഇടംകാലാകും. ചെറിയ കുട്ടിയായിരുന്നപ്പോൾ ടിവിയിൽ കളി കാണുമ്പോഴേ ലോകകപ്പ് കളിക്കാൻ ആഗ്രഹിച്ചിരുന്നു. അത് സാധ്യമാക്കാൻ ഞാൻ ദിവസവും കഠിനാധ്വാനം ചെയ്യുന്നു.”

കോമോയെ ചാമ്പ്യൻസ് ലീഗിലെത്തിക്കുക, കോപ്പ ഇറ്റാലിയ ഫൈനലിൽ എത്തിക്കുക, കൂടാതെ ലോകകപ്പ് സ്വപ്നം സാക്ഷാത്കരിക്കുക എന്നിവയാണ് നിക്കോ പാസിന്റെ പ്രധാന ലക്ഷ്യങ്ങൾ. റയൽ മാഡ്രിഡിലേക്കുള്ള തിരിച്ചുപോക്കിന്റെ സൂചനകൾക്കിടയിലും തന്റെ കരിയറിലെ ഉയർച്ചയ്ക്കായി കഠിനപ്രയത്നം തുടരുകയാണ് ഈ അർജന്റീനൻ താരം.