മാഞ്ചസ്റ്റർ സിറ്റി വിട്ട് ആഴ്‌സണലിലേക്ക് ചേക്കേറാനുള്ള തന്റെ തീരുമാനത്തെക്കുറിച്ച് ഒലക്സാണ്ടർ സിഞ്ചെങ്കോ മനസ്സ് തുറന്നു. 2022-ൽ 30 ദശലക്ഷം പൗണ്ടിന്റെ സ്ഥിര കരാറിലാണ് താരം മാഞ്ചസ്റ്റർ സിറ്റിയിൽ നിന്ന് ലണ്ടൻ ക്ലബ്ബായ ആഴ്‌സണലിലെത്തിയത്.

തുടർന്ന് ഈ സീസണിന്റെ അവസാനം വരെ സിഞ്ചെങ്കോ ലോൺ അടിസ്ഥാനത്തിൽ അയാക്സിലേക്ക് മാറിയിരുന്നു. എന്നാൽ തന്റെ ആദ്യ മത്സരത്തിൽ തന്നെ പരിക്കേറ്റ താരം, ബാക്കി സീസണിൽ നിന്നും പുറത്തായി.

സിഞ്ചെങ്കോയുടെ വാക്കുകൾ: “എല്ലാ കാര്യങ്ങളും താരതമ്യത്തിലൂടെയാണ് മനസ്സിലാകുന്നത്. മാഞ്ചസ്റ്റർ സിറ്റിയിൽ ഞാൻ വിജയിയായിരുന്നുവെന്ന് നിങ്ങൾ പറയുമായിരിക്കും. എന്നാൽ ഞാൻ ഒപ്പം കളിച്ച മറ്റ് താരങ്ങളുമായി താരതമ്യം ചെയ്യുമ്പോൾ, ഞാൻ അത്ര വലിയ വിജയമൊന്നുമല്ല. ഇത്തരം കാര്യങ്ങളിൽ ഞാൻ വളരെ ഭാഗ്യവാനാണ്, കാരണം അത്രയും മികച്ച ആളുകൾക്ക് ഒപ്പവും ചുറ്റും നിൽക്കാനുള്ള അവസരം എനിക്ക് ലഭിച്ചു – താരങ്ങൾ മാത്രമല്ല, പരിശീലകരും മറ്റെല്ലാവരും അതിൽ ഉൾപ്പെടുന്നു. കാരണം, ഒരുപാട് കാര്യങ്ങൾ കാണാനും പഠിക്കാനും എനിക്ക് സാധിച്ചു.”

“ആഴ്‌സണലിലേക്കുള്ള എന്റെ ട്രാൻസ്ഫറിനെക്കുറിച്ച് പറയുകയാണെങ്കിൽ, മിക്കൽ ആർട്ടെറ്റയിൽ നിന്ന് ഒരു കോൾ വന്നിരുന്നു. ക്ലബ്ബിലെ എന്റെ സാഹചര്യത്തെക്കുറിച്ച് അദ്ദേഹം ചോദിച്ചു. സിറ്റിയിൽ കാര്യങ്ങളെല്ലാം ഏകദേശം ഭംഗിയായി നടക്കുകയായിരുന്നു. വൈകാരികമായും ദൈനംദിന ജീവിതത്തിന്റെ കാര്യത്തിലും ഞാൻ വളരെ സന്തോഷവാനായിരുന്നു. എനിക്ക് ആരോടും ദേഷ്യമോ അതൃപ്തിയോ ഉണ്ടായിരുന്നില്ല.”

“എല്ലാ കാര്യങ്ങളും വിശദമായി വിവരിക്കാതെ ചുരുക്കത്തിൽ പറയാം: ആഴ്‌സണലിൽ നിന്ന് ലഭിച്ചതുപോലെയുള്ള ശ്രദ്ധയും, ടീമിലെടുക്കാനുള്ള താൽപ്പര്യവും മറ്റൊരിടത്തുനിന്നും എനിക്ക് ലഭിച്ചിട്ടില്ല. ഹെഡ് കോച്ചും ഡയറക്ടറും സ്വകാര്യ വിമാനത്തിൽ എന്നെ കാണാൻ വരികയും, ഞാനും എന്റെ കുടുംബവുമായി സംസാരിച്ച് പ്രോജക്റ്റിനെക്കുറിച്ചും അതിൽ എന്റെ പങ്കിനെക്കുറിച്ചും വിശദീകരിച്ച് ക്ലബ്ബിലേക്ക് വരാൻ പ്രേരിപ്പിക്കുകയും ചെയ്തു. അത് നിരസിക്കാൻ എനിക്ക് വളരെ ബുദ്ധിമുട്ടായിരുന്നു.”

“മാത്രമല്ല, ആ സമയത്ത് മാഞ്ചസ്റ്റർ സിറ്റി വിട്ട് പ്രീമിയർ ലീഗിൽ തന്നെ തുടരണമെന്ന് തീരുമാനിച്ചപ്പോൾ, എനിക്ക് മുന്നിലുണ്ടായിരുന്ന പ്രധാന പരിശീലകൻ അദ്ദേഹം മാത്രമായിരുന്നു – ആ പേര് നമുക്കെല്ലാവർക്കും അറിയാം.”