തുടർച്ചയായി രണ്ടാം തവണയും ചാമ്പ്യൻസ് ലീഗ് കിരീടം സ്വന്തമാക്കിയതിന് പിന്നാലെ ക്ലബ്ബിലെ മുഴുവൻ ജീവനക്കാർക്കും നന്ദി അറിയിച്ച് പിഎസ്ജി പ്രസിഡന്റ് നാസർ അൽ-ഖെലൈഫി കത്തെഴുതി.

“ആദ്യ വിജയം ചരിത്രപരമായ ഒരു സംഭവമാണെങ്കിൽ, തുടർച്ചയായ രണ്ടാം വിജയം ഇതിഹാസതുല്യമാണ്. ഇത് വലിയൊരു അഭിമാന നിമിഷമാണ്,” അൽ-ഖെലൈഫി പറഞ്ഞു.

“ക്ലബ്ബിലെ ഓരോ ജീവനക്കാരനോടും ഞാൻ വ്യക്തിപരമായി കടപ്പെട്ടിരിക്കുന്നു. പിഎസ്ജിയിൽ എല്ലാ ചാമ്പ്യൻമാരും കളിക്കളത്തിലല്ല ഉള്ളത്. ആവേശത്തോടും അർപ്പണബോധത്തോടും കൂടി ദിവസവും പ്രവർത്തിക്കുന്ന മുഴുവൻ സംഘത്തിന്റേതുമാണ് ഈ വിജയം,” അദ്ദേഹം കൂട്ടിച്ചേർത്തു.

“പിഎസ്ജിക്ക് ഇത് അസാധാരണമായ ഒരു സീസണായിരുന്നു. വിനയം, ഉയർന്ന നിലവാരം, അഭിനിവേശം എന്നീ മൂല്യങ്ങൾ മുറുകെപ്പിടിച്ച് നാം ഇനി ഭാവിയെക്കുറിച്ച് ചിന്തിക്കണം. എല്ലാവരും ഒറ്റക്കെട്ടായി മുന്നേറണം. ഇതാണ് പാരീസ്,” എന്നും അൽ-ഖെലൈഫി കത്തിൽ വ്യക്തമാക്കി.