തന്റെ കരിയറിലെ ആറാമത്തെ ഫിഫ ലോകകപ്പിന് (FIFA World Cup) ഇറങ്ങാൻ പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോ തയ്യാറെടുത്തു കഴിഞ്ഞു. ഡിആർ കോംഗോയ്‌ക്കെതിരായ മത്സരത്തോടെയാണ് പോർച്ചുഗലിന്റെ ഈ ലോകകപ്പ് ക്യാമ്പെയ്‌ന് തുടക്കമാകുന്നത്.

മത്സരത്തിന് മുന്നോടിയായി തന്റെ സഹതാരങ്ങൾക്കും ആരാധകർക്കുമായി റൊണാൾഡോ സമൂഹമാധ്യമങ്ങളിലൂടെ സന്ദേശം പങ്കുവെച്ചു.

സഹതാരങ്ങൾക്കൊപ്പമുള്ള ചിത്രം പങ്കുവെച്ചുകൊണ്ട് അദ്ദേഹം കുറിച്ചത് ഇങ്ങനെ: “ഈ ജേഴ്സി അണിയുമ്പോഴെല്ലാം ആദ്യത്തെ ദിവസത്തെപ്പോലെ തന്നെ അഭിമാനവും ആവേശവും ഉത്തരവാദിത്തവും ഞങ്ങൾ അനുഭവിക്കുന്നു.”

“നാളെ പുതിയൊരു അധ്യായം തുടങ്ങുകയാണ്. ഈ നിമിഷത്തിനായി ഞങ്ങൾ കഠിനാധ്വാനം ചെയ്തു. രാജ്യത്തിനും ലോകമെമ്പാടുമുള്ള പോർച്ചുഗീസ് ആരാധകർക്കും വേണ്ടി എല്ലാം നൽകാൻ സമയമായിരിക്കുന്നു. ഞങ്ങളെപ്പോലെ നിങ്ങളും വിശ്വസിക്കുക!”

ലോകകപ്പിൽ ഇതുവരെ കളിച്ച 22 മത്സരങ്ങളിൽ നിന്ന് എട്ട് ഗോളുകൾ റൊണാൾഡോ നേടിയിട്ടുണ്ട്. തന്റെ കരിയറിൽ ആദ്യമായി ഈ അഭിമാനകരമായ കിരീടം സ്വന്തമാക്കാനാണ് താരം ലക്ഷ്യമിടുന്നത്.