പ്രൊഫഷണൽ ഫുട്ബോളിലേക്ക് ഇനി തിരിച്ചുവരില്ലെന്ന് ജർമ്മൻ ഇതിഹാസ താരം ടോണി ക്രൂസ് വ്യക്തമാക്കി. റയൽ മാഡ്രിഡിനൊപ്പമുള്ള തന്റെ കരിയർ അവസാനിപ്പിച്ച രീതിയിൽ താൻ പൂർണ്ണ സംതൃപ്തനാണെന്ന് അദ്ദേഹം പറഞ്ഞു.

ലോറസ് സ്പോർട്ടിംഗ് ഇൻസ്പിറേഷൻ അവാർഡ് സ്വീകരിച്ച ശേഷം സംസാരിക്കുകയായിരുന്നു മുൻ മധ്യനിര താരം. ഫുട്ബോളിലേക്ക് മടങ്ങിയെത്തുന്നതിനെക്കുറിച്ച് താൻ ഒട്ടും ചിന്തിച്ചിട്ടില്ലെന്ന് ക്രൂസ് വ്യക്തമാക്കി.

“ഞാൻ ആഗ്രഹിച്ച രീതിയിൽ തന്നെ കരിയർ അവസാനിപ്പിച്ചതുകൊണ്ട്, തിരിച്ചുവരവിനെക്കുറിച്ച് ചിന്തിച്ചിട്ടുപോലുമില്ല,” ടോണി ക്രൂസ് പറഞ്ഞു.

“ഞാൻ ആ അധ്യായം അവിടെ അവസാനിപ്പിച്ചു. ഇനി തിരികെ വരണമെന്ന് ആഗ്രഹിച്ചാലും, അതിനേക്കാൾ മികച്ചൊരു പടിയിറക്കം സാധ്യമായിരുന്നില്ല എന്ന് ഞാൻ വിശ്വസിക്കുന്നു. അതിനുശേഷം വരാനിരുന്നതെല്ലാം ഇതിനേക്കാൾ മോശമായിരുന്നേനെ. ജീവിതത്തിൽ മറ്റ് ലക്ഷ്യങ്ങളും പുതിയ പദ്ധതികളും ഇപ്പോൾ എനിക്കുണ്ട്.”

റയൽ മാഡ്രിഡിനായി 465 മത്സരങ്ങളിൽ കളത്തിലിറങ്ങിയ ക്രൂസ് 23 കിരീടങ്ങൾ നേടിയിട്ടുണ്ട്. അഞ്ച് ചാമ്പ്യൻസ് ലീഗ് കിരീടങ്ങൾ, നാല് ലാ ലിഗ കിരീടങ്ങൾ, ഒരു കോപ്പ ഡെൽ റേ, നാല് സ്പാനിഷ് സൂപ്പർ കപ്പുകൾ, അഞ്ച് ഫിഫ ക്ലബ് വേൾഡ് കപ്പുകൾ, നാല് യുവേഫ സൂപ്പർ കപ്പുകൾ എന്നിവ ഇതിൽ ഉൾപ്പെടുന്നു.

തന്റെ അന്താരാഷ്ട്ര കരിയറിൽ ജർമ്മനിക്കായി 114 മത്സരങ്ങളിൽ നിന്ന് 17 ഗോളുകളും 21 അസിസ്റ്റുകളും താരം സ്വന്തമാക്കിയിട്ടുണ്ട്.